कर्णालीमा गुडिरहेको बसमा करेन्ट लाग्दा २ जनाको ज्यान गयो

२१ असार, काठमाडौं । दाङको तुलसीपुरबाट रोल्पाको दलसिंगेका लागि छुटेको यात्रुवाहक बसमा करेन्ट लाग्दा २ जनाको घटनास्थलमै ज्यान गएको छ । मृत्यु भएको छ । अन्य १ जना घाइते भएका छन् ।

तुलसीपुरबाट रा १ ख ८३४ नम्बरको बस बिहीबार बिहान कर्णालीकाे सल्यानस्थित राप्ती राजमार्गको चोर खोला नजिकै पुग्दा ढलेको बिजुलीको पोलमा रहेको तारले छुँदा बसमा करेन्ट लागेको थियो । 

करेन्ट लागेर बसमा यात्रारत बाबुछोराको मृत्यु भएको छ भने अन्य १ जना गम्भीर घाइते भएका छन् । घाइते हुनेमा सल्यान छत्रेश्वरी गापा –६ का महेन्द्र वली रहेका । उनलाई उपचारको लागि दाङको तुलसीपुर पठाइएको छ । उनी बस धनी रहेकाे बुझिएकाे छ ।

गएराति हावाहुरीसँगै परेको पानीका कारण तारसहित बिजुलीको पोल ढलेको र बस त्यहाँबाट पार गर्ने क्रममा छोइँदा करेन्ट लागेको पाइएको प्रहरीको भनाइ छ । मृत्यु हुनेमा रोल्पा दलसिंगेका कालुराम डाँगी र टोपीलाल डाँगी रहेका छन् । घाइतेहरुको परिचय प्राप्त भइसकेको छैन । बसमा २५ भन्दा बढी यात्रु सवार रहेको बताइएको छ । 

घटनास्थलमा प्रहरीले अध्ययन र मुचुल्का उठाउने काम भइरहेको जनाइएको छ । घटनापछि सडक अवद्ध बनेको छ । खुलाउने प्रयास भइरहेको छ ।