नागरिक उड्डयन प्राधिकरणका महानिर्देशक अधिकारीलाई पर्यटन मन्त्रालयले सोध्यो दोस्रोपटक स्पष्टीकरण

२१ असार, काठमाडौं । संस्कृति, पर्यटन तथा नागरिक उड्डयन मन्त्रालयले नेपाल नागरिक उड्डयन प्राधिकरणका महानिर्देशक प्रदीप अधिकारीलाई दोस्रो पटक स्पष्टीकरण सोधेको छ । पर्यटनमन्त्री सुदन किराँतीले मन्त्रीस्तरीय निर्णय गर्दै दोस्रो स्पष्टीकरण सोधेका हुन् । 

पहिलो पटक नौ बुँदे स्पष्टीकरण सोधिएको थियो । जवाफ पेस गर्न सात दिनको समय दिइएको थियो । तर, महानिर्देशक अधिकारीले उक्त समयमा अटेरी गरेर जवाफ दिएका थिएनन् । बिहीबार पुनः स्पष्टीकरण सोधिएको हो । जवाफ नदिनुको कारण स्पष्ट रूपमा उल्लेख गरेर तीन दिनभित्र जवाफ पेस गर्न मन्त्रालयले निर्देशन दिएको छ ।

निर्धारित समयमा जवाफ नदिए कानुन बमोजिम अघि बढ्ने मन्त्रालयले जनाएको छ । पछिल्लो समय मन्त्री किराँती र अधिकारी बीचको विवाद सतहमा आएको छ । मन्त्री किराँती अधिकारीलाई पदबाट बर्खास्त गर्ने रणनीतिमा छन् । प्रधानमन्त्री पुष्पकमल दाहाल प्रचण्ड र मन्त्री किराँतीबीच पनि अधिकारीलाई कारबाही गर्ने विषयमा छलफल भइरहेको छ ।