नेपाली कांग्रेसका जिल्ला सभापतिहरुको सानेपामा नयाँ सदस्यता नवीकरणसम्बन्धी अभिमुखिकरण

२१ असार, काठमाडौं । सदस्यता नवीकरणसम्बन्धी अभिमुखीकरणको लागि नेपाली कांग्रेसका जिल्ला सभापतिहरूको बैठक पार्टी कार्यालय सानेपामा चलिरहेको छ । क्रियाशील सदस्यता र सदस्यताको वितरण, नवीकरण र अभिलेखिकरण, पार्टीका विभिन्न तहका सम्मेलन, पार्टी संचालन तथा व्यवस्थापनलगायत अन्य विविध सांगठनिक विषय बैठकको एजेन्डा रहेका छन् ।

कांग्रेसले तल्लो तहबाटै संगठन विस्तार सम्बन्धी कार्यक्रमहरू सुरु गर्ने तयारी अनुरूप सभापतिहरूको बैठक बोलाएको हो । पहिलो चरणमा क्रियाशील सदस्यता नवीकरण र नयाँ सदस्यता वितरण कार्यलाई व्यवस्थित रुपमा अगाडि बढाउने विषयमा छलफल भइरहेको छ । क्रियाशील सदस्य नवीकरणसहित नयाँ सदस्य थप गर्ने विषयलाई कसरी प्रभावकारी ढंगले अगाडि बढाउन सकिन्छ भन्ने रणनीति तय गर्न कांग्रेसले ७७ वटै जिल्लाका सभापतिहरूलाई काठमाडौं बोलाएर अभिमुखीकरण गर्न लागेको हो ।

नेपाली कांग्रेस प्रचार विभाग प्रमुख मीन विश्वकर्माले दिएको जानकारी अनुसार सभापतिहरूलाई जिल्ला तह र त्यसभन्दा मुनिका निकायमा कसरी संगठन विस्तारका कार्यक्रमहरू बनाउने, विभाजन गर्ने र सञ्चालन गर्ने भन्ने विषयमा अभिमुखीकरण गरिनेछ । क्रियाशीलको नवीकरण र नयाँ सदस्यता थप गर्ने विषयलाई प्रभावकारी बनाउन कांग्रेस नयाँ रणनीति र स्पष्ट योजनासहित जाने तयारी स्वरूप सभापतिसँग अभिमुखीकरणको कार्यक्रम राखेको हो । 

यसको अलवा जिल्ला सभापतिहरूसँग जिल्लामा भइरहेका पछिल्ला गतिविधिहरूबारे पनि जानकारी लिइने छ । प्रचार विभाग प्रमुख विश्वकर्माले पार्टीको केन्द्रीय समितिको बैठकमा उठाइने एजेण्डाहरुका लागि पनि जिल्ला सभापतिहरूको छलफल र परामर्शबाट धेरै कुराहरू आउने बताए । उनले कांग्रेस सबै किसिमका समस्याहरूसँग जुध्न सक्ने गरि तल्लो तहबाटै संगठनका गतिविधिहरू परिचालन गर्ने तयारीमा रहेको बताए । कांग्रेसले असार २७ गते केन्द्रीय समितिको बैठक बोलाएको छ ।