कोशीमा मुख्यमन्त्रीका लागि दाबी पेश गर्दै कांग्रेसका उद्वव थापा

२० असार, मोरङ । कोशी प्रदेशमा सरकार गठनका लागि मुख्यमन्त्रीमा नेपाली कांग्रेस संसदीय दलका नेता उद्धव थापाले दाबी पेश गर्दैछन् ।

थापाले कांग्रेस, माओवादी केन्द्र, एकीकृत समाजवादी र जनता समाजवादी पार्टीका सांसदहरुको पनि समर्थन लिएर थापा बिहीबार साढे ४ बजे मुख्यमन्त्रीमा दाबी पेश गर्न प्रदेश प्रमुखको कार्यालय जाने तयारी गरेका छन् । 

प्रदेश प्रमुख परशुराम खापुङले संविधानको धारा १६८ (२) अनुसार आज साँझ ५ बजेको समयसीमा तोकेर मुख्यमन्त्रीमा दाबी पेश गर्न आह्वान गरेबमोजिम उनले समयभित्रै दाबी पेस गर्ने भएका हुन् । 

कोशी प्रदेशसभाका ९३ सांसद छन् । बहुमत अर्थात सरकार गठनका लागि ४७ सांसदको समर्थन आनिवार्य हुन्छ । थापाको पक्षमा हालसम्म सभामुखसहित ४७ जनाको समर्थन रहेको छ । तर सभामुखले दाबी पेसमा नै हस्ताक्षर गर्न पाउने विषयमा प्रश्न उठेको छ । सभामा प्रस्तावमा हुने पक्ष र विपक्षमा मत बराबर हुँदा निर्णायक मत दिन पाइने व्यवस्था रहेपनि दाबी पेस निवेदनमै हस्ताक्षरको स्पष्ट व्यवस्था नहुँदा विवादित बन्ने खतरा पनि उत्तिकै रहेको छ । 

सभामुख बाबुराम गौतम माओवादी केन्द्रका हुन् । यसअघि अल्पमतमा परेका मुख्यमन्त्री हिक्मतकुमार कार्कीले सभामा विश्वासको मत लिने प्रसताव राख्दा उनको पक्षमा ४६ मत मात्र परेका कारण पदमुक्त हुन पुगेका थिए । 

थापाले सरकारमा ल्याउन ६ सांसद रहेका राप्रपालाई सक्दो मेहनत गरेपनि राप्रपा नगलेपछि सरकार गठनका लागि आवश्यक समर्थन पाउने विषय गठबन्धनलाई पनि मुश्किल परेको छ । बहुमत पुर्याउन थापाले राप्रपासँग मुख्यमन्त्रीमा आलोपालो गर्ने प्रस्ताव समेत राखेका चर्चा चलेका बेला राप्रपाले भने एमाले र कांग्रेस मिलेर सरकार बनाउन सुझाव दिइरह्यो । 

कांग्रेसका २९, माओवादी केन्द्रका सभामुखसहित १३, एकीकृत समाजवादीका ४ र जनता समाजवादी पार्टी (जसपा)का १  प्रदेश सांसद छन् । 

यस्तै एमालेसँग ४० र राप्रपासँग ६ सांसद छन् । केन्द्र सरकारमा विपक्षमा रहेका एमाले र राप्रपा सबै प्रदेशमा सँगै उभिएका छन् । थापाकाे पक्षमा समर्थन नगर्न माथिबाट निर्देशन आएकाे राप्रपा सांसद सविना बजगाईले बताइन् ।

राप्रपा समर्थन नगर्ने अडान कायमै रहे थापालाई बहुमतकाे सरकार गठनमा दाबी पेस गर्नमै समस्या पर्नेछ ।

यसैबीच सरकार गठनका लागि गरिने दाबी पेसमा सभामुखलाई समेट्न नमिल्ने तर्क निवर्तमान मुख्यमन्त्री एवं एमालेका संसदीइ दलका नेता कार्कीले गरेका छन् ।