प्रितम सिंहले भने- प्रचण्डसँग पारिवारिक सन्बन्धबाहेक अन्य केही हाेइन

२१ असार, काठमाडौं । प्रधानमन्त्री प्रचण्डलाई अभिव्यक्ति विवादमा तानिने विषयका पात्र सरदार प्रितम सिंहले आफू सामान्य मान्छे भएको प्रष्टिकरण दिएका छन् ।

सिंहको जीवनीमा विश्वदीप सन्धुले लेखेको पुस्तक विमोचन कार्यक्रममा प्रधानमन्त्री प्रचण्डले आफूलाई प्रधानमन्त्री बनाउन सिंह पटकपटक नयाँ दिल्ली गएको भनी दिएको अभिव्यक्तिलाई विपक्षी दलहरुले संसद बैठक अवरुद्ध गर्ने तहसम्म उत्रिरहेको अवस्थामा सिंहले काठमाडाैंमा संचारकर्मीहरूसँगकाे कुराकानीमा आफू राजनीतिक व्यक्ति नभएकाे र कुनै हिसाबबाट किङ मेकर नभई सामान्य मान्छे भएको प्रष्टीकरण दिएका हुन् । उनले पत्रकार सम्मेलनमा बोल्दै प्रचण्डसँग राजनीतिक नभई पारिवारिक सम्बन्ध मात्रै भएको प्रष्ट पारे । 

उनले प्रचण्डको अभिव्यक्ति सुनेर आफूलाई आश्चर्य लागेको समेत बताए । उनले समस्या पर्दा प्रचण्डका परिवारलाई सहयोग गरेको बताउँदै प्रचण्डका दिवंगत छोरा प्रकाश आफ्नो नातिको साथी भएको बताए ।