प्रधानमन्त्री प्रचण्डविरुद्ध एमाले विद्यार्थीको प्रदर्शन

२१ असार, काठमाडौं । प्रधानमन्त्री पुष्पकमल दाहाल ‘प्रचण्ड’को आफूलाई भारतले प्रधानमन्त्री बनाएको आशयको अभिव्यक्तिलाई लिएर एमालेनिकट विद्यार्थी संगठन अनेरास्ववियुले काठमाडौ.मा प्रदर्शन गरेको छ ।

प्रदर्शनीमार्गस्थित रत्नराज्‍य लक्ष्मी क्याम्पस (आरआर क्याम्पस) अगाडि प्रधानमन्त्री प्रचण्डविरुद्ध अनेरास्ववियुमा आवद्ध विद्यार्थीहरुले हाम्रो प्रधानमन्त्री हामी आफैं बनाउँछौं’ भन्दै बिहीबार दिउँसो प्रदर्शन गरेका छन् । 

प्रदर्शनकारीहरुले प्रधानमन्त्री प्रचण्डको अभिव्यक्तिले राष्ट्रको बेइज्जत र शिर निहुराउने काम भएको भन्दै सरकार मुर्दावाद लगायत प्रधानमन्त्रीको राजीनामा माग गरेका छ्न् । उनीहरूले सरकारविरूद्ध विभिन्न नारा लेखिएका प्लेकार्ड प्रदर्शन गरे ।

‘रोड्स टु द भ्याली स् द लिगेसी अफ सरदार प्रितम सिंह इन नेपाल’ पुस्तकको सोमबार भएको विमोचन कार्यक्रममा  प्रधानमन्त्री प्रचण्डले एक पटक आफूलाई प्रधानमन्त्री बनाउन प्रितम सिंह पटकपटक नयाँ दिल्ली गएको र नेपालका नेताहरुसँग पनि बाक्लो भेटघाटमा दौडधुप गरेको बताएका थिए । 

त्यसपछि उनको अभिव्यक्तिलाई लिएर राजनीतिक र जनस्तरमा आलोचना भइरहेको छ । संसदका विपक्षी दलहरु एमाले, रास्वपा र राप्रपाले संसदको दुवै सदन राष्ट्रियसभा र प्रतिनिधिसभाको हिजो र आजको बैठक चल्न दिएनन् ।