सन नेपाल लाइफ इन्स्योरेन्सले आईपीओ बिक्री खुला गर्ने

२२ असार, काठमाडौं । सन नेपाल लाइफ इन्स्योरेन्सले वैदेशिक रोजगारीमा रहेका नेपालीहरूलाई साउन १ गतेदेखि आईपीओ बिक्री खुला गर्ने भएको छ । इन्स्योरेन्सले आफ्नो जारी पुँजी ३ अर्ब २० करोड रूपैयाँको ३० प्रतिशतले हुन आउने ९६ करोड रूपैयाँ बराबरको आईपीओ सर्वसाधारणलाई जारी गर्न धितोपत्र बोर्डबाट अनुमति पाएको थियो । 

यसको ९ लाख ६० हजार कित्ता शेयर पहिलो चरणमा वैदेशिक रोजगारीमा रहेका नेपालीहरूलाई जारी गर्न लागेको हो । कम्पनीले प्रति कित्ता १ सयअंकित मूल्यमा १३९ रूपैयाँ प्रिमियम थप गरेर २३९ रूपैयाँ दरमा आईपीओ जारी गर्न लागेको हो । 

वैदेशिक रोजगारीमा रहेका नेपालीहरूले यसमा साउन १५ गतेसम्म आवेदन दिन सकिनेछ । लगानीकर्ताले यसमा न्यूनतम् १० कित्तादेखि अधिकतम २० हजार कित्ताको लागि आवेदन दिन सक्नेछन् । लगानीकर्ताले सी–आस्वा प्राप्त बैंक तथा वित्तीय संस्था तथा मेरो शेयरमार्फत सेयर भर्न सक्नेछन् । 

रेटिङ एजेन्सी केयर नेपालले सन नेपाल लाइफको आईपीओलाई ‘केयरएनपी त्रिपल बी प्लस इस्यूअर रेटिङ’ प्रदान गरेको छ । जसले कम्पनीको दायित्व बहन गर्ने क्षमतामा मध्यमस्तरको जोखिम रहेको जनाउँछ । यो आईपीओमा नेपाल एसबिआई मर्चोन्ट बैंकिङ बिक्री प्रबन्धक रहेको छ ।