समाजवादी मोर्चाले सरकारका काम र संसदमा प्रतिपक्षको भूमिकाबारे समीक्षा गर्ने

२३ असार, काठमाडौं । कम्युनिष्ट पार्टीहरुलाई एकिकृत गर्ने उदेश्यले हाले गठन भएको समाजवादी मोर्चा नेपालको पहिलो बैठक आज डाकिएको छ । बैठक पछिल्लो राजनीतिक घटना क्रमको विवेचना गर्न र आगामी रणनीति तय गर्न डाकिएको हो । 

नेकपा एकीकृत समाजवादी को केन्द्रीय कार्यालय, अलोकनगरमा आज अपराह्न ४ बजे बस्ने बैठकले मुलुकमा विकासित राजनीतिक घटनाक्रममा मोर्चाले निर्वाह गर्नुपर्ने भूमिका, सरकारका गतिविधि र संसदमा प्रतिपक्षी दल नेकपा एमालेलगायतका ददले खेलिरहेको भूमिकामाथि समीक्षा गर्ने बताइएको छ । 

बैठकमा मोर्चालाई थप सशक्त बनाउने कस्ता कार्ययोजनाहरु बनाउने भन्ने विषयमा छलफल हुनेछ । मोर्चामा आबद्ध चार दलका अध्यक्ष सहभागी हुने सो बैठकमा मोर्चाको आलोपालो नेतृत्व एवं आगामी दिनमा गर्ने कार्ययोजनाबारे छलफल हुने नेकपा एकीकृत समाजवादीका नेता जगन्नाथ खतिवडाले जानकारी दिए ।

नेकपा माओवादी, जनता समाजवादी पार्टी, नेकपा एकीकृत समाजवादी र विप्लव नेतृत्वको नेपाल कम्युनिष्ट पार्टीका शीर्ष नेताको अगुवाईमा यही असार ४ गते मोर्चा घोषणा गरिएको थियो ।