देउवा सानेपा नगएपछि दुई पार्टीको आभास दिएर सकियो कांग्रेस जिल्ला सभापतिहरुको दुई दिने भेला

२३, असार, काठमाडौं । नेपाली कांग्रेस एक भएर पार्टी रुपान्तरणका लागि अब नयाँ ढंगबाट अगाडि जाँदैछ भन्ने आम सन्देश दिन र जिल्ला जिल्लाका पछिल्ला गतिविधिबारे जानकारी लिएर रुपान्तरणका लागि आगामी कार्यदिशा बनाउने उद्देश्यले डाकिएको जिल्ला सभापतिहरूको भेला अन्ततः गुटभन्दा पनि कांग्रेसमा दुई पार्टी छन् भन्ने सन्देश दिएर सकिएको छ । 

पार्टीका क्रियाशील सदस्यहरूको सदस्यता नवीकरण, नयाँ सदस्यता वितरण, अभिमुखीकरण र आगामी पार्टी रुपान्तरणका लागि नयाँ नीति तथा कार्यक्रमहरू बनाउने विषयमा अभिमुखीकरण गर्ने भनेर ७७ वटै जिल्ला सभापतिहरुलाई निमन्त्रणा दिइएको थियो । लामो समयसम्म कुनै पनि पार्टीगत गतिविधि नगरेको कांग्रेस एकै पटक जिल्ला सभापतिहरूलाई काठमाडौंमा बोलाउँदा कांग्रेसले के गर्दैछ भन्ने चासो पनि बढेको थियो । 

बुधबार बिहान सभापति शेरबहादुर देउवा, उपसभापति र महामन्त्रीद्वयको छलफलले असार २७ मा केन्द्रीय समितिको बैठक बोलाउने निर्णय गरेको थियो । केन्द्रीय समितिको बैठकभन्दा अगाडि सबै जिल्ला सभापतिहरूलाई पार्टीको केन्द्रीय कार्यालयमा बोलाउँदा अन्य राजनीतिक दलहरुलाई पनि कांग्रसले केही निर्णय गर्न लागेको हो कि भन्ने आभास भएको थियो ।  

कांग्रेसभित्रै पनि लामो समयपछि केन्द्रीय समितिको बैठक बोलाउनु र त्यसअघि जिल्ला सभापतिको भेला डाक्नुले आम कार्यकर्ता एकखाले पार्टीका शुभचिन्तकहरुमा अब कांग्रेसले एकताको सन्देश दिन खोजे जस्तो अनुमान लगाएका थिए । तर, नतिजा यसको विपरीत आयो । कांग्रेसमा दुई गुट छन भन्ने भन्दा पनि दुई पार्टी नै भएको जस्तो देखियो । 

विधान बमोजिम महामन्त्रीले पार्टीका जिल्ला सभापतिहरूको भेला बोलाएका थिए । महामन्त्रीले निमन्त्रण दिएको भएपनि कमसेकम केन्द्रीय कार्यालयमा बोलाइएको भेलाको उद्‍घाटनमा पार्टी सभापति शेरबहादुर देउवा उपस्थित हुनुपर्ने हो । तर, देउवा दुवै दिन पार्टी कार्यालय गएनन् । बरु उल्टै धुम्बाराहीमा आफु पक्षका सभापतिहरूलाई बोलाएर सानेपा भेलाको रिपाटिङ लिए । यसले सानेपामा भएको जिल्ला सभापतिहरूको भेला सिंगो कांग्रेसको नभएको अनुभूति दियो । 

अर्को महामन्त्रीले बोलाएको भेलामा ७७ वटै जिल्लाका सभापतिहरु  आएनन् । ४२ जिल्लाका सभापति र अठार जिल्लाका प्रतिनिधिमात्र उपस्थित भए । केही जिल्ला सभापतिहरूसँग भर्चुअल कुराकानी पनि गरिएको भनियो । पार्टीका आन्तरिक कुरामा पदाधिकारी तहमा नै कांग्रेस एक छैन भन्ने सन्देश यसले दिएको छ । सभापतिले पनि सानेपामा भइरहेको जिल्ला सभापतिहरूको भेला देउवा कांग्रेसको नभएर अर्कै कांग्रेसको भएको जसरी नै लिएको देखियो ।  
 
भेलाको उद्घाटनमा आउन नसके पनि सभापति देउवा समापनका दिन उपस्थित भएका भएपनि सन्देश अर्को जाने थियो । महामन्त्रीहरूले पार्टीमा बढेको असन्तुष्टि र कांग्रेसप्रति वितृष्ण जागेर धमाधम पार्टी छोडिरहेका नेता कार्यकताहरुलाई रोक्नका लागि कार्यक्रम बनाउन सभापतिको भेला बोलाएका थिए । यसमा देउवाको उपस्थितिले मात्रै पनि छुट्टै सन्देश जाने थियो । तर, उनी सानेपा गएनन् र यसले कांग्रेसमा बदलाब ल्याउने संकेत पनि दिएन ।     

सभापतिको भेलाको समापनमा देउवा आउने धेरैको अपेक्षा थियो । तर, भयो उल्टो । सानेपामा सभापति भेलाको समापन भइरहेका बेला उता सभापति पत्नी आरजु राणा देउवाले तरुण दलका केन्द्रीय सदस्यहरूलाई भेला गराइन । आरजुले डाकेको भेला भने देउवा कांग्रेसको भेला जस्तै थियो । किनभने आरजुले छानी छानी देउवा पक्ष भनेर चिनिएकालाई मात्र  निम्ता पठाएकी थिइन् ।  

उनले आफ्ना पति पक्षका तरुण केन्द्रीय सदस्यहरू बोलाएर कांग्रेसले लिएको विचार र सिद्धान्तकै कारण मुलुकमा लोकतन्त्र स्थापना भएको बताइन । विगतमा नेपाली कांग्रेसले लिएको सिद्धान्तकै कारण आज मुलुकमा लोकतन्त्र स्थापना भएको हो र लोकतान्त्रिक शासन व्यवस्थाका कारण नै देश विकासले गति लिएको भन्दै डा.राणाले विसं २००७ सालको क्रान्तिदेखि २०६२-६३ को जनआन्दोलनको पाठ पढाउँदै गौरवशाली इतिहासलाई मनन् गरेर तरुण दलका कार्यकर्ताहरू लाग्नुपर्ने बताइन् ।

यता, सानेपामा चौध बुँदे आन्तरिक प्रतिबद्धता पारित गर्दै कांग्रेस जिल्ला सभापतिहरूको भेला समापन हुँदै थियो । त्यहाँ देउवा पक्षका एक जना पनि सभापति उपस्थित थिएन । धुम्बाराहीमा छुट्टै भेटघाट थियो । समापनमा पार्टीका महामन्त्री द्वय गगनकुमार थापा र विश्वप्रकाश शर्माले प्राप्त सुझावलाई पार्टी तहमा छलफल गरी आवश्यकताअनुसार आगामी केन्द्रीय कार्यसमितिको बैठकमा प्रस्तुत गर्ने प्रतिवद्धता व्यक्त गरेका थिए ।