एमाले बलियो राजनीतिक शक्ति निर्माण गर्ने पक्षमा छः महासचिव पोखरेल

२३ असार, काठमाडौं । नेकपा एमालेका महासचिव शंकर पोखरेलले बलियो राष्ट्रिय शक्ति निर्माण अभियानमा लागेको बताएका छन् । उनले पार्टीको प्राथमिकतामा सत्ता सत्ता नरहेको बताएका छन् । बलियो राजनीतिक शक्ति निर्माण गरेर मात्रै मुलुक निर्माण गर्न सकिने निष्कर्षका साथ एमाले अघि बढिरहेको महासचिव पोखरेलको भनाइ छ । 

काठमाडौंमा शनिबार आयोजित पार्टीको कार्यक्रममा महासचिव पोखरेलले कमजोरहरूको सहकार्यबाट राष्ट्र निर्माण हुन नसक्ने निष्कर्षसहित बलियो शक्ति निर्माणमा लागेको बताए । एमालेले सत्ता प्राप्तिलाई प्राथमिकतामा नराखी शक्ति निर्माणमा जुटेको उनको भनाइ छ । 

उनले भने, अहिले हाम्रा लागि सत्ता प्रधान होइन, हाम्रा लागि राष्ट्रको भविष्य प्रदान हो । अब यो राष्ट्र निर्माण गर्नका लागि कमजोरहरूको सहकार्यबाट राष्ट्रको निर्माण हुन सक्दैन । बलियो राष्ट्रिय शक्तिको रूपमा एमालेको विकास अबको हाम्रो संकल्प हो भन्ने मान्यताका आधारमा हामीले मिसन ग्रासरुट अभियान थालेका थियौ । त्यही मिसन ग्रासरुट अभियानको जगमा यतिबेला एमाले बलियो राष्ट्रिय शक्ति निर्माणको संकल्पका साथ नयाँ योजना, नयाँ संकल्पका साथ अगाडि बढन खोजिरहेको छ ।’

 धेरै राजनीतिक दल हुँदा मुलुकमा राजनीतिक अस्थिरता उत्पन्न भएको पनि पोखरेलको भनाइ थियो । यस्तो अवस्थामा वैदेशिक हस्तक्षेप पनि बढेको उनले बताए । ’जति धेरै राजनीतिक दल, त्यति धेरै नीतिगत विचलन । जति धेरै राजनीतिक दल, त्यतिधेरै राजनीतिक अस्थिरता । जति धेरै राजनीतिक दल, त्यतिधेरै वैदेशिक चलखेल । जतिधेरै राजनीतिक दल, राष्ट्रको भविष्य अँध्यारो हुन्छ,’ उनले भने, ’धेरै राजनीतिक दल होइन्, बलिया राजनीतिक दलतर्फ अब समाजलाई डोहो¥याउन जरुरी छ ।’