कोशीमा माओवादी केन्द्रका २ सहित थप ३ मन्त्री नियुक्त, ४ जना विनाविभागीय

२४ असार, विराटनगर । कोशी प्रदेशका नवनियुक्त मुख्यमन्त्री उद्धव थापाले थप ३ मन्त्री नियुक्त गरेका छन् । यसअघि उनले कांग्रेसबाट २ मन्त्री नियुक्त गरिसकेका छन् । आज माओवादी केन्द्रका २ र कांग्रेसका १ गरी ३ मन्त्री नियुक्त गरेका हुन् । 

नियुक्त हुने मन्त्रीहरुमा माओवादी केन्द्रबाट जीवनआचार्य र रोजेन्द्र कार्की र नेपाली कांग्रेसबाट रामुकमार खत्री रहेका छन् । उनीहरुलाई प्रदेश प्रमुख परशुराम खापुङले आजै शपथ खुवाएका छन् । योसँगै ६ सदस्यीय मन्त्रिपरिषद बनेको छ । यसअघि मुख्यमन्त्री थापाले शुक्रबार कांग्रेसका प्रदीप सुनुवार र एकीकृत समाजवादीका कमल जवेगुलाई मन्त्री नियुक्त गरेका थिए । 

मन्त्री आचार्यलाई आर्थिक मामिला तथा योजना मन्त्रालयको जिम्मेवारी दिइएको छ । र्काी, खत्री, सुनुवार र जबेगुलाई मन्त्रालय तोकेका छैनन् । उनीहरु चारै जना बिनाविभागीय मन्त्रीको रुपमा रहनेछन् । कांग्रेसबाट थापा यही असार २१ गते संविधानको धारा १६८ को (२)बमोजिम मुख्यमन्त्री नियुक्त भएका थिए ।

यद्यपि उनको नियुक्तिका लागि अपनाइएका प्रक्रिया संविधानविपरीत भएको भन्दै नियुक्ति खारेजीका लागि सर्वोच्चमा परेको रिट निवदेनमाथि आजै सुनुवाइ हुँदैछ ।