चौथो दिन पनि राष्ट्रियसभाको बैठक अवरुद्ध

२४ असार, काठमाडौं । प्रमुख प्रतिपक्षी दल नेकपा (एमाले)ले राष्ट्रियसभाको आजको बैठक पनि अवरुद्ध पारेको छ । प्रधानमन्त्री प्रचण्डको विवादस्पद अभिव्यक्तिलाई लिएर चौथो पटक पनि  बैठक अवरुद्ध गरेको हो । 

बैठक सुरू भएलगत्तै सांसदहरूले प्रधानमन्त्रीले दिएको आफूलाई प्रधानमन्त्री बनाउन भारतीय मूलका नागरिक प्रितम सिंह पटकपटक भारत धाएको र नेपालका नेताहरुसँग बाक्लो भेटघाट गरेको भनी दिएको अभिव्यक्ति राष्ट्रविरोधी भएको र यसमा जवाफ नभई राजीनामा दिनुपर्ने माग गरिन् । राजीनामा नआएसम्म संसद चल्न नदिने अडान दोहोर्याइन् ।

बैठकमा विभिन्न मन्त्रालय, राष्ट्रपति कार्यालय लगायतमाथि विनियोजित बजेटमाथि खर्च कटौतीसम्बन्धी पेस भएका प्रस्तावमाथि दफावार छलफल गर्ने कार्यसूची रहेको छ । सभाका अध्यक्ष गणेशप्रसाद तिमिल्सिनाको पटकपटक आग्रहपछि पनि बैठक चल्न सकेको छैन । यसअघि लगातार ३ पटक बैठक अवरुद्ध गरेका थिए ।

सोही विषयलाई लिएर एमालेले प्रतिनिधिसभाको बैठक ३ पटक अवरुद्ध पारेको थियो । आजको बैठक पनि चल्न नदिने उसले तयारी गरेको छ ।