रकस्टार रविन तामाङको अन्तिम संस्कार स्वयम्भूमा

२४ असार, काठमाडौं । दिवंगत रकस्टार र अभिनेता रविन तामाङको अन्तिम बिदाई गरिएको छ । नेपाल संगीत तथा नाट्य एकेडेमीमा तामाङको पार्थीव शरीरमा संस्कृति, पर्यटन तथा नागरिक उड्डययन मन्त्री सुदन किरातीले राष्ट्रिय झण्डा ओढाएर अन्तिम श्रद्धाञ्जली दिएर बिदाई गरेका हुन् । अन्तिम श्रद्धाञ्जली दिन मन्त्री, नेता, शुभेच्छुक र कलाकर्मी सहभागी भएका थिए । 

उपस्थित कलाकर्मीहरुले फूलमाया चढाएर तामाङप्रति श्रद्धासुमन व्यक्त गरे । अन्तिम श्रद्धाञ्जलीका लागि बिहानभर पार्थीव शरीरलाई एकेडेमीमा राखिएको थियो । मन्त्री किरातीले श्रष्टाहरुको निधनले माैलिक कलाको विकास र संस्कृतिको संरक्षण ठूलो क्षति पुगेको बताए । उनले राष्ट्रिय व्यक्तित्वको निधनपनि श्रद्धाञ्जलीका पार्थीव शरीर राख्नका लागि व्यवस्थित ठाउँ पनि नभएको भन्दै आफ्नै कार्यकालमा व्यवस्थित भवन बनाउने बताए ।

कार्यक्रममा सरकारको प्रवक्ता समेत रहेकी सञ्चार तथा सूचना प्रविधिमन्त्री रेखा शर्माले कलाक्षेत्रले उज्ज्वल नक्षत्र गुमाएको बताउँदै कला र संस्कृतिको संरक्षणका लागि सरकार कलाकर्मीसँग हातेमालो गरेर अगाडि बढ्न तयार रहेको बताइन् । दिवंगत तामाङप्रति उनलले श्रद्धाञ्जली व्यक्त गरिन् । 

नेपाली कांग्रेसका महामन्त्री गगनकुमार थापाले तामाङकाे निधनले नेपाली कला र माैलिकता संरक्षणमा ठूलाे क्षति प्रतिक्रिया दिए । तामाङप्रति श्रद्धाञ्जली व्यक्त गरे ।

रविन तामाङको पार्थिव शरीरलाई बौद्ध धर्म परम्पराअनुसार स्वयम्भूमा दहासंस्कार गरिनेछ । तामाङ गत मंगलबार तामाङ बुढानिलकण्ठस्थित निवासमा मृत भेटिएका थिए । नेपाली रक जनराको संगीतमा उनको योगदान उल्लेखनीय मानिन्छ ।