शीर्ष तीन नेताबीच प्रधानमन्त्रीले सम्बोधन गरेर अवरुद्ध संसद सुचारु गर्ने सहमति

२४ असार, काठमाडौं । चार दिनदेखि अवरुद्ध संसद खोल्ने विषयमा शीर्ष नेताहरुबीच सहमति भएको छ । प्रधानमन्त्री पुष्पकमल दाहाल, प्रमुख प्रतिपक्षी दलका नेता केपी शर्मा ओली र कांग्रेस सभापति शेरबहादुर देउवाबीच संसद्को अवरोध हटाउने विषयमा समझदारी बनेको हो । 

प्रधानमन्त्री प्रचण्डले आइतबार ३ बजेका लागि तय भएको बैठकलाई सम्बोधन गरेर प्रतिनिधिसभा बैठक अगाडि बढाउने समझदारी भएको एमाले र कांग्रेस नेताहरूले जानकारी दिएका छन् ।

प्रधानमन्त्रीले आफ्ना कुरा राखेर सदनको अवरोध हटाउने समझदारी भएको छ । असार १८ गते प्रचण्डले दिएको अभिव्यक्तिलाई लिएर एमालेले प्रधानमन्त्रीको राजीनामा मागेको थियोे ।

प्रधानमन्त्री प्रचण्डका स्वकीय सचिव रमेश मल्लले छलफल सकारात्मक भएको जानकारी दिएका छन् । कांग्रेसका मुख्य सचेतक रमेश लेखकले पनि प्रधानमन्त्री बैठकको सुरुमा बोल्ने र संसद् सुचारु राख्ने विषयमा समझदारी बनेको जानकारी दिए । बैठक ३ बजेसम्म सारिएको छ ।