ईन्जिनियर कुटपिट गर्ने एमाले नेता र वडाध्यक्ष पक्राउ

२४ असार, काठमाडौं । मुगुको जिल्लाको पूर्वाधार विकास कार्यालय मुगका निमित्त कार्यालय प्रमुख ईन्जिनियर दत्त थापालाई कार्यालयमै कुटपिट गर्ने एक वडा अध्यक्ष र एमालेका जिल्ला नेतालाई प्रहरीले पक्राउ गरेको छ ।

पक्राउ पर्नेमा छायाँनाथ रारा नगरपालिका–६ का वडा अध्यक्ष खेमबहादुर रावल र एमाले नेता दानसिंह परियार रहेका छन् । उनीहरुले प्रमुख ईन्जिनियर बुढा थापामाथि शनिबार हातपात गरी कुटपिट गरेका थिए । 

चालु आर्थिक वर्ष २०७९/८० को प्रदेश सांसद विकास कोषमार्फत सञ्चालित योजनाको काम लागत स्टेमेटअनुसारको नभएको भन्दै रकम भुक्तानी पूरा दिन प्रतिवेदन दिन नमिल्ने बताएपछि बुढा थापामाथि कार्यालयभित्रै कुटपिट गरेका हुन् । कुटपिट गर्ने दुवै जनालाई शनिबार नै हिरासतमा लिएको छ ।

४० लाखको योजनाको १० लाख र ५० लाखको योजनामा ३० लाख रुपैयाँभन्दा माथिको काम नभएको प्रतिवेदन इन्जिनियरको दाबी छ । भएको कामको मात्र रकम भुक्तानी गर्न सिफारिस गरेपछि उनीमाथि निरन्तर धम्की दिँदै आएका थिए । अपूरा कामको सबै पैसा दिन भन्दै उपभोक्ता समिति, ठेकेदार र तिनका संरक्षणमा लागेका नेताहरुले प्राविधिकहरुलाई ज्यान मार्ने तहसम्मका धम्की दिने गरिएको गुनासो छ । 

चालु आर्थिक वर्ष योजना र ठेक्काको भुक्तानी भोलिसम्म हुने अवस्था छ । त्यसपछि प्राविधिककाे सिफारिसमा राेक्का भएका रकम बेरूजुमा राखिँदै आएकाे छ ।