प्रधानमन्त्रीको स्पष्टीकरण हेरेर एमालेले संसद अवरोध खोल्नेबारे निर्णय लिने

२५ असार, काठमाडौं । विगत पाँच दिनदेखि अवरुद्ध हुँदै आएको संघीय संसद आज पनि खुल्ने नखुल्ने अनिर्णीत छ । संसदको अवरोध खोल्ने बारे प्रधानमन्त्री पुष्पकमल दाहाल, नेपाली कांग्रेसका सभापति शेरबहादुर देउवा र प्रमुख प्रतिपक्ष दल नेकपा एमालेका अध्यक्ष केपी शर्मा ओलीबीच आज भएको छलफल सकिएको छ । 

सिंहदरबार स्थित प्रधानमन्त्रीको कार्यालयमा तीन जनाबीच छलफल भएको हो । छलफलमा के सहमति भयो भन्ने नेताहरूले बताएनन् । ओलीको प्रतिक्रिया अनुसार प्रधानमन्त्रीलाई सम्बोधन गर्न दिने र त्यसपछि चित्त बुझ्दो नभए अवरोध कायमै राख्ने  एमालेको तयारी रहेको बुझिन्छ । 

प्रधानमन्त्री दाहालसँगको छलफल सकेर कांग्रेस सभापति देउवा र एमाले अध्यक्ष ओली सँगै बाहिरिएका थिए । सोमबार संसदमा अवरोध खुल्छ भन्ने सञ्चारकर्मीको प्रश्नमा एमाले अध्यक्ष ओलीले भने, पार्लियामेन्टमा पुगेपछि थाहा हुने बताए । 

यसअघि आइतबार पनि प्रतिनिधिसभाको बैठकको अवरोध खुलाउने बारेमा तीन दलका शीर्ष नेताहरूबीच सहमति भए पनि अन्तिममा भाँडिएको थियो । आइतबारको छलफलमा उनीहरूबीच प्रधानमन्त्री पुष्पकमल दाहालले असार १८ गते एक कार्यक्रममा दिएको अभिव्यक्तिबारे संसदको रोष्ट्रमबाट आत्मालोचना गर्ने शीर्ष नेताको समझदारी भएको बताइएको थियो । 

प्रतिनिधिसभाको आजको ३ बजे डाकिएको बैठकमा प्रधानमन्त्रीले सम्बोधन गर्ने जनाइएको छ ।  प्रधानमन्त्री प्रचण्डले आफूलाई प्रधानमन्त्री बनाउन भारतीय नागरिक प्रितम सिंह धेरै पटक दिल्ली गएको भन्ने अभिव्यक्ति दिएपछि एमालेले प्रधानमन्त्रीको राजीनामा माग गर्दै संसद अवरोध गर्दै आएको छ ।