ललिता निवासमा जग्गा हिनामिना प्रकरणमा औद्योगिक घराना शंकर समूह पनि संलग्न !

२५ असार, विराटनगर । राजश्व छलि लगायतका विभिन्न गैरकानुनी कार्यमा संलग्न भएको आरोपमा पटक पटक कारबाहीमा पर्दै आएको औद्योगिक घराना शंकर समूहको पनि ललिता निवास जग्गा हिनामिना प्रकरणमा संलग्नता रहेको बताइएकाे छ । सीआईबी स्राेतका अनुसार शंकर समूहले पनि ललिता निवासको जग्गा खरिद गरेको खुलेको छ । यसअघि सारडा समूहको पनि ललिता निवास प्रकरणमा संलग्नता पाइएको थियो ।  

ललिता निवास प्रकरणमा संलग्न रहेको पाइएपछि प्रहरीको केन्द्रीय अनुसन्धान ब्यूरोले सो समूहका अध्यक्ष शंकरलाल अग्रवाल,साहिल अग्रवाल र सुलभ अग्रवालसँग सोधपुछ गर्ने तयारी गरिरहेकाे बताइएकाे छ । प्रहरी स्रोतका अनुसार शंकर समूहका अध्यक्ष शंकरलाल अग्रवालसहितलाई संगठित अपराध अन्तर्गत कारबाही अगाडि बढाइने छ । प्रहरी स्रोतका अनुसार सारडा र शंकर समूहबाहेक पनि केही औद्योगिक घरानाको पनि यस प्रकरणमा संलग्नता रहेका आशंका गरिएको छ ।  

सीआईबीले ललिता निवास जग्गा हिनामिना प्रकरणको फाइल खोलेर अनुसन्धान अगाडि बढाएपछि यति बेला उद्योगी व्यवसायीमा तरंग पनि फैलिएको छ । यस प्रकरणमा संलग्न व्यवसायीहरू पक्राउ पर्ने डरले धमाधम फरार पनि हुन थालेका छन् । उनीहरूले सस्तो मूल्यमा ललिता निवासले चर्चेको जग्गा खरिद गरी अन्यलाई बिक्री समेत गरेको खुलेको छ । प्रहरीले अनुसन्धान गर्ने भनेपछि सारडा समूहका अध्यक्ष शिवरतन सारडासहित पाँच जना यति बेला फरार नै भएका छन् । 

शंकर समूह त्यही समूह हो जसले राज्य संकटमा परेका बेलासमेत विभिन्न जालसाझी र राजश्व ठग्ने अपराध गरेको थियो । कोरोना संक्रमणबाट बच्न सरकारले चार्टर गरेर चीनबाट पठाएको विमानमा सेटिङ मिलाएर आफ्नो व्यक्तिगत सामान ल्याउन सफल भएका शंकर समूहका उपाध्यक्ष साहिल अग्रवालले ५ करोड लगानी गरेर २० हजार थान थर्मल गन नेपाल भित्र्याएका थिए । उनले सो समय भन्सारमा जम्मा १ हजार २ सय थानको मात्रै भन्सार बुझाएका थिए । अग्रवालको साथबाट प्रहरीले ६७ थान थर्मल गन पनि नियन्त्रणमा लिइएको थियो ।

यस्तै रमेश हमाललाई बोर्डको अध्यक्षमा नियुक्त गरेको एक महिनामै हमालसँग मिलेर बोर्ड सञ्चालक समितिबाट निर्णय गराएर इन्फोमेरिक्स क्रेडिट नेपाल लिमिटेडलाई ’क्रेडिट रेटिङ’ सेवा प्रदान गराउन सफल भएको आरोप लागेकाे थियाे । इन्फोमेरिक्स क्रेडिट नेपाल लिमिटेडमा व्यावसायिक घराना शंकर समूह अन्तर्गतका लगानीकर्ताको गैरकानुनी लगानी भएको दावी समाचार स्राेतकाे छ । हमालको नियुक्तिमा शंकर समूहका निर्देशक द्वय साहिल अग्रवाल र सुलभ अग्रवालको सहयोग रहेको आरोप लाग्दै आएकाे छ । 

यो समूह पटक पटक भन्सार प्रशासनलाई नै झुक्याएर कारोबार गरेको आरोपमा पटक पटक कारबाहीमा पनि पर्दै आएको छ । अहिले ललिता निवास जग्गा प्रकरणको अनुसन्धानमा पनि शंकर समूहका सदस्यहरू तानिने भएपछि निकै खैलाबैला मच्चिएको छ । सीआईबीको कारबाही रोक्न शंकर अग्रवाल यति बेला राजनीतिक दलको शरणमा पुगेको बताइएको छ । गृहमन्त्री नारायणकाजी श्रेष्ठलाई प्रलोभनमा पारेर कारवाहीबाट उम्कने प्रयास गरिरहेको बुझिएको  छ।     

शंकर समूका व्यक्तिको नाममा ललिता निवासमा कति जग्गा छ भन्ने प्रहरीले अनुसन्धान गरिरहेको बताएकाे छ । प्रहरी स्राेतका अनुसार ३९७ जनाको लिष्टमा उनीहरूको पनि नाम समावेश छ । उनीहरूले कतिमा कति जग्गा किनेका थिए भन्ने कुरा जान्नका लागि पनि सीआइबीले सोधपुछ गर्ने तयारी गरेको हो । ललिता निवासको चार नम्बरपछिको जग्गा उनीहरूले किनेको बुझिएको छ । पक्राउ पर्ने डरले शंकर समूहले उद्योग व्यवसायीका छाता संगठनहरुसँग पनि हारगुहार मागिरहेको दावी स्राेतकाे छ ।