कोसी प्रदेशको मुख्यमन्त्री नियुक्तिविरुद्धको रिट न्यायाधीश श्रेष्ठको इजलासमा

२६ असार, काठमाडौं । कोसी प्रदेश सरकारविरुद्धको रिटको सुनुवाइ आज सर्वोच्च अदालतका न्यायाधीश तिलप्रसाद श्रेष्ठको इजलासमा परेको छ । रिटको सुनुवाइ १४औँ नम्बरमा रहेको छ ।

यसअघि दुईपटक सुनुवाइ तोकिए पनि हेर्न नभ्याउने हुँदै स्थगित भएको थियो । आज पनि १४ औँ नम्बरमा परेरकाले रिटमाथि सुनुवाइ हुने÷नहुने टुंगो छैन ।

गएको बिहीबार सभामुख समेतलाई समेटेर प्रदेश सरकार गठन गरिएपछि नेकपा (एमाले)का तर्फबाट रिट दायर गरिएको थियो । कोसीका निर्वतमान मुख्यमन्त्री तथा एमाले संसदीय दलका नेता हिक्मतकुमार कार्कीले संविधानविपरीत सरकार गठन गरिएको भन्दै रिट दायर गरेका हुन् ।

रिटमा हालै नियुक्त भएका मुख्यमन्त्री उद्धव थापा, प्रदेश प्रमुख पर्शुराम खापुङ र प्रदेशसभाका सभामुख बाबुराम गौतमलाई विपक्षी बनाइएको छ ।