धैर्य बसौँ, बेपत्ता हेलिकप्टर खोज्न अर्को हेली पठाएका छौः मन्त्री किराती

 २६ असार, काठमाडौं । संस्कृति, पर्यटन तथा नागरिक उड्डयन मन्त्री सुदन किरातीले मनाङ एयरको हेलिकोप्टर हराएको जानकारी गराउँदै काठमाडौंबाट अर्को हेली खोजीमा पठाइएको बताएका छन् । 

सामाजिक सञ्जालमा उनले घटनाबारे केही समयपछि सत्य तथ्य आउने समेत बताउँदै धैर्यताबाहेक अरू केही विकल्प नरहेको बताएका छन् । 

सोलुखुम्बुमा दुर्घटना भएको मनाङ एअरको हेलिकोप्टरमा सवार पाँच जना यात्रु विदेश नागरिक भएको र सवार सबै मेक्सिकन नागरिक भएको बताइएको छ ।  

सोलुखुम्बुको लुक्लास्थित सुर्केबाट उडेको हेलिकोप्टर सोलु दूधकुण्ड नगरपालिका–२ स्थित लामाजुरा डाँडामा दुर्घटना भएको आशंका प्रहरीले गरेको छ । लामाजुरा डाँडामा हेलिकोप्टर दुर्घटना भएको सूचनाको आधारमा त्यसतर्फ प्रहरी परिचालन गरिएको कोशी प्रदेश प्रहरीले जानकारी दिएको छ ।