कोशीका मुख्यमन्त्री नियुक्तिविरुद्धको रिट न्यायाधीश सपना प्रधानको इजलासमा

२७ असार, काठमाडौं । तीन दिनदेखि हेर्न नभ्याइनेमा पर्दै आएको कोशी प्रदेशका मुख्यमन्त्री नियुक्तिविरुद्धको रिट न्यायाधीश सपना प्रधानको एकल इजलासमा परेको छ । नियुक्त प्रक्रिया असंवैधानिक रहेको दाबी गर्दै सर्वोच्च अदालतमा दायर रिट निवेदन बुधबार न्यायाधीश सपना प्रधानको इजलासमा पेसी तोकिएको छ । 

गत शुक्रबार दर्ता भएको उक्त रिट निवेदनमा चौथो पटक पेसी तोकिएको हो । यद्यपि, आइतबार, सोमबार र मंगलबार पेसी तोकिए पनि यो रिट निवेदनमा सुनुवाइ हुन सकेन । लगातार तीन दिन हेर्न नभ्याइने सूचीमा परेको यो रिट निवेदन बुधबार चौथो दिन पेसीमा चढेको छ ।
 
कोशी प्रदेशका निवर्तमान मुख्यमन्त्री हिक्मत कार्कीले शुक्रबार वारेसमार्फत सर्वोच्चमा रिट निवेदन दर्ता गराएका थिए । नेकपा एमालेका तर्फबाट कोशी प्रदेशमा संसदीय दलका नेतासमेत रहेका कार्कीले नवनिर्वाचित मुख्यमन्त्री उद्धव थापा, प्रदेश प्रमुख पर्शुराम खापुङ र सभामुख बाबुराम गौतमलाई रिट निवेदनमा विपक्षी बनाएका छन् ।