व्यावहारिक र गुणस्तरीय शिक्षा मुलुक विकासको आधार : सभामुख घिमिरे

३१ असार, काठमाडौं । प्रतिनिधिसभाका सभामुख देवराज घिमिरेले व्यवहारिक र गुणस्तरीय शिक्षा दिन सक्ने मुलुकले मात्रै समृद्धि हासिल गर्न सक्ने भएकाले शिक्षा सुधारका लागि प्राथमिकता दिनुपर्ने बताएको छ ।
   
‘केन्द्रविन्दू डटकम’ले आज यहाँ आयोजना गरेको शैक्षिक अवार्ड कार्यक्रममा सभामुख घिमिरेले समाजको विकासका सन्दर्भमा जुनरुपमा शिक्षाको विकास हुनुपर्ने थियो त्यसरुपमा हुन नसकेको कुरा आएको सन्दर्भमा उत्कृष्ट शिक्षा सेवा दिने शिक्षालय र व्यक्तिलाई प्रोत्साहित गर्दै आपसी हातेमालो गरेमा शैक्षिक विकासमा योगदान पुग्न सक्ने उल्लेख गरे ।
 
‘‘हामीले प्राप्त गरेको ज्ञान र  ज्ञानको हस्तान्तरण गर्दै शैक्षिक विकास र व्यावहारिक शिक्षाका माध्यमबाट मुलुकले समृद्धि हासिल गर्न सक्छ ।’’, उनले भने, ‘‘कानुन र नीति निर्माण गर्ने सन्दर्भमा संसदको भूमिकाका लागि मेरो सँधै सकारात्मक भूमिका हुने हुनेछ ।’’
      
कार्यक्रममा सरकारका मुख्यसचिव डा. वैकुण्ठ अर्यालले शैक्षिक विकास तथा  नीतिगत सुधार र कार्यान्वयनमा सम्बन्धित सरोकारवालाबाट साझा पहल हुनुपर्नेमा जोड दिए । मुख्यसचिव अर्याल, राष्ट्रिय परीक्षा बोर्डका अध्यक्ष डा. महाश्रम शर्मा, शिक्षाविद् डा सुरेशराज शर्मालगायतले विभिन्न शिक्षालय र शिक्षाकर्मीलाई सो अवसरमा सम्मान गरेको थियो ।