सिंहदरबारमा उच्च कर्मचारीको अघोषित हड्ताल, मुख्यसचिव र गृहसचिवको कार्यकक्षमा धर्ना

३१ असार, काठमाडौं । केही दिनदेखि सिंहदरबारभित्र कर्मचारीले काम गर्न छाडेका छन् । ललितानिवास जग्गा प्रकरणमा सञ्चार सचिव कृष्णबहादुर राउत पक्राउ परेको विरोधमा उनीहरूले अघोषित रुपमा काम गर्न छाडेका हुन् । आइतबार ब्याच १८ अर्थात् २०५९ का शाखा अधिकृत पास गरेका सचिव र सहसचिवहरूको टोलीले मुख्यसचिव बैकुण्ठ अर्याल तथा गृहसचिव दिनेश भट्टराईलाई भेटेर आफू  काम गर्न र मातहतका कर्मचारीलाई काम गराउन अप्ठेरो भएकोले त्यसको वातावरण बनाउन माग गर्दै दिन भरी नै उनीहरूको कार्यकक्षमा बसेर आग्रह गरेका थिए । 

उनीहरूले सचिव कृष्ण बहादुर राउत पक्राउको प्रकृया गलत भएको र खास गरी उसको अपराध के हो त्यसको बारेमा जानकारी गराउनु पर्ने माग गरेका थिए ।  मुख्यसचिव र गृहसचिवलाई भेटेर प्रकृया गलत भयो, यसले काम गर्न अप्ठेरो भयो भन्यौ, कर्मचारीको अभिभावकको जिम्मेवारी र भूमिकालाई मुख्यसचिव र गृहसचिवलाई लिन आग्रह गर्यो’, आइतबार भेटघाट गरेका एक कर्मचारीले भने । आइतबार २३ जना कर्मचारीले मुख्यसचिव बैकुण्ठ अर्याल र गृहसचिव दिनेश भट्टराईलाई भेटेका थिए । ‘आइतबार दिउँसो एक प्रकारले मुख्यसचिव र गृहसचिवको कार्यकक्षमा हामीले धर्ना दिएका छौ’, एक सचिवले भने । 

ललितानिवास प्रकरणमा बहालवाला सचिव नै पक्राउ पर्न थालेसँगै निजामती कर्मचारीहरू आक्रोशित बनेका छन् । निर्णय पालना गर्ने कर्मचारीलाई पक्राउ गर्दा निर्णयकर्ताहरूले भने उन्मुक्ति पाइरहेको विषयमा कर्मचारीहरूले साङ्केतिक रूपमा विरोध गर्दै आएका छन् । केही दिन अघि कृष्णहरि पुष्करले पनि मुख्यसचिवलाई भेटेर सर्वोच्चमा अपील गर्नुपर्ने आग्रह गरेका थिए । 

‘ब्लाक एण्ड ह्वाइट’ फोटोमा टाईको नोट मिलाउँदै गरेको दृश्यको फोटोमा लेखिएको छ, ‘निर्णयकर्तालाई उन्मुक्ति निमुखालाई हत्कडी ?’ यो आकृतिको फोटो प्रोफाइलमा राख्दै अधिकांश कर्मचारी यति बेला विरोधमा उत्रिएका छन् । उक्त फोटोमा देखाइएको टाई लगाएको व्यक्तिले निर्णयकर्ता या माथिल्लो पदमा रहेका उच्च पदस्थलाई संकेत गरेको छ । गत आइतबार सञ्चार सचिव कृष्णबहादुर राउत परेका थिए ।  

बहालवाला कर्मचारीसहित पूर्व प्रशासक समेतले टिप्पणी उठाउने कर्मचारीलाई पक्राउ गर्दा उपल्लो दर्जामा रहेकालाई केरकार किन नगरेको भन्दै प्रश्न गरेका थिए । केही दिनअघि मात्रै पूर्व मुख्यसचिव विमल कोइरालाले समेत सामाजिक सञ्जाल फेसबुकमार्फत प्रश्न गरेका थिए । तत्कालीन समयमा टिप्पणी उठाउने र राय लेख्ने कर्मचारीहरू धमाधम पक्राउ पर्दा निर्णयकर्ताहरूलाई केरकार किन नगरेको भन्ने उनको प्रश्न थियो । 

राउत पक्राउलाई नेपाल सरकारको सचिव नभएर शाखा अधिकृत पक्राउको रूपमा लिएका छन् । भौतिक पूर्वाधार मन्त्रालयमा शाखा अधिकृत हुँदा राउतले ललिता निवासको जग्गा व्यक्तिका नाममा दिने निर्णयको टिप्पणी उठाएको कारण पक्राउ परेका हुन् । उनलाई गत आइतबार त्रिभुवन विमानस्थलबाटै पक्राउ गरिएको थियो ।