उपत्यकाबाट फोहोर बोकेर बञ्चरेडाँडा गएका गाडीमा अवरोध, जनप्रतिनिधिबाटै प्रदर्शन

१ साउन,  काठमाडौं । बञ्चरेडाँडा ल्यान्डफिल्ड साइटमा फोहोर विसर्जनमा फेरी अवरोध सुर भएको छ । फोहोर फाल्न नदिने भन्दै ककनी गाउँपालिकाका स्थानीय र जनप्रतिनिधि आन्दोलनमा उत्रिएका छन् । फोहोर र मानिसलाई सँगै राख्न नमिल्ने भन्दै आफूहरूले पटक पटक माग राख्दा पनि सुनुवाइ नभएकाले आन्दोलनमा उत्रनु परेको उनीहरूले बताएका छन् । 

सोमबार बिहानैदेखि वडाध्यक्ष बजगाईंसहितको टोलीले बन्चरे डाँडा नजिकैको आलेटार क्षेत्रमा फोहोर बोकेर गएका उपत्यकाका गाडीहरूलाई अवरोध गरेका छन् । त्यहाँका स्थानीयबासी अव्यवस्थित ढंगबाट फोहोर विसर्जन गर्दा झिँगा धेरै आउन थालेपछि स्थानीय आक्रोशित बनेका छन् । 

केही दिनअघि ककनी गाउँपालिकाले फोहोर बोकेर आउने गाडीहरूलाई प्रवेश शुल्क लिने निर्णय गरेको थियो । तर स्थानीयले शुल्क भन्दा नागरिकको स्वास्थ्य महत्त्वपूर्ण भन्दै फोहोर विसर्जन गर्न नदिने अडान लिएपछि अहिले जनप्रतिनिधिहरू नै फोहोर विसर्जन गर्न नदिने भन्दै आन्दोलनमा उत्रिएका छन् ।