आफन्तबाहेक मधेशमा कांग्रेस नदेखेका सभापति यादवलाई अनलाइन सदस्यता सिस्टम किन भयो घाँडो ?

३ साउन, काठमाडौं । नेपाली कांग्रेसको केन्द्रीय समिति बैठकमा कांग्रेस मधेश-प्रदेशका सभापति कृष्णप्रसाद यादवले अनलाइन सिस्टमबाट सदस्यता थप्ने विषयको विरोध गरेका छन् । यसरी सदस्यता थप्ने काम भयो भने मधेशमा कांग्रेस निमिट्यान्न भएर जाने उनको हास्यास्पद तर्क छ । 

गएको अधिवेशनबाट सभापति भएका यादवको सबैभन्दा ठूलो रोग भनेको आफन्त र चिनजानबाहेक अरूलाई कांग्रेस हुनै नसक्ने र बनाउनै हुन्न भन्ने हो । उनलाई कुनै नयाँ व्यक्तिलाई सदस्यता बनाउँदा आफन्तहरू ओझेलमा पर्ने डर सदैव हुने गरेको मधेशका कांग्रेस कार्यकर्ताहरू बताउँछन् । पछिल्लो समय सभापति भएर उनले यही भूमिका निभाइरहेका छन् । 
 
उनी मधेश प्रदेशका सभापति हुन । उनले मधेशमा कति नयाँ सदस्यता थप्ने काम गरे र भएका क्रियाशील सदस्यहरूलाई परिचालन गरे भन्ने कुरा गएको निर्वाचनमै देखिएको हो । कांग्रेसकाे मुख्य आधार भूमि भएको मधेशमा उनी सभापति भएपछि नेकपा एमाले पहिले दलका रुपमा उदायो । उनी सभापति भएर बसेको पार्टी, कांग्रेसको उपस्थिति मधेशलाई केन्द्र बनाएर राजनीति गरिरहेका दलकै हैसियतमा आइपुग्यो । 

एमाले र माओवादी मिलेको अवस्थामा भन्दा पाँच दलीय गठबन्धनमा कांग्रेसकाे अवस्था झनै खस्किन पुग्यो । सदस्यताकै हिसाबले हेर्ने हो भने पनि मधेश पछिल्लो समय निकै कमजोर बन्दै गइरहेको छ । मधेशमा जिम्मेवारी लिएर बसेका यादव जस्ता नेताहरू आफन्त र भनेकाे मान्नेबाहेकलाई नयाँ सदस्यता दिनै चाँहदैनन् । नयाँ सदस्यता बनाएर आफ्नो आधार इलाकालाई बलियो बनाउन काम त झन पर कै कुरा भयो । 

८ जिल्ला रहेको मधेश अन्य प्रदेशको तुलनामा जनसंख्या धेरै भएको प्रदेश हो । तर, यही कांग्रेसको सदस्यता संख्या कम छ । अहिले यादव लगायतका जिल्लाका नेताहरू अनलाइलाई सिस्टमको विरोधमा यसकारण पनि छन् कि भोलि आफूलाई नचिनेका मान्छे पनि सदस्य भएर आए भने आफूले बनाएको भन्दा उनीहरूको संख्या बढी हुन्छ र आफू अल्पमतमा परिन्छ । कांग्रेस बलियो हुने भन्दा पनि कांग्रेस भित्रकै अर्को पक्ष बलियाे भएर आउँछ भन्ने उनलाई चिन्ता  छ ।     

यसकारण यादवले अनलाइनबाट नयाँ सदस्यता थप्ने प्रस्तावको बैठकमा विरोध गरेका हुन । कांग्रेसबाट फाइदा लिने तर, कांग्रेसलाई बलियो बन्न नदिने यादव जस्ता नेताका कारण नै अहिले मधेशमा कांग्रेस दिनप्रतिदिन कमजोर बनिरहेको अब केन्द्रले पनि बुझ्न आवश्यक भइसकेको छ । अन्यथा मधेशमा सदस्यता बढाउन सकिँदैन । कांग्रेसकै थालमा खाएर काँग्रेस कै कार्यकर्तालाई अरू पार्टीमा जान प्रोत्साहन गर्ने नेताबाट  नयाँ सदस्यता थप्न सकिँदैन । 

मधेशमा नेविसंघ र युवाहरूको पकड पनि पछिल्लो समय निकै कमजोर बनिरहेको  छ । अहिले  नेविसंघको तदर्थ समिति बन्दैछ । तर, मधेशबाट कार्य क्षेत्रमा खटिएका भन्दा नेविसंघका नाममा सदस्य बनेकाहरूको नाम केन्द्रमा सिफारिस भएर आएको छ । यस हिसाबले पनि मधेशमा अहिले नेतृत्वमा रहेका यादव जस्ता नेताहरुकै कारण विष्फोट आउने सम्भावना देखिँदैछ ।