उद्योग मन्त्रीसमक्ष सुनचाँदीमा लगाइएको दुई प्रतिशत थप सेवाशुल्क हटाउन माग

६ साउन, काठमाडौं । उद्योग, वाणिज्य तथा आपूर्ति मन्त्री रमेश रिजाल समक्ष व्यवसायीहरूले सरकारले सुनचाँदी व्यवसायमा लगाएको कर हटाउन माग गरेका छन् । शुक्रबार नेपाल रत्न तथा आभूषण संघको १८ औं वार्षिक साधारणसभालाई सम्बोधन गर्न पुगेका मन्त्री रिजाल समक्ष  नेपाल रत्न तथा आभूषण संघले आग्रह गरेको हो ।  

कार्यक्रममा नेपाल चेम्बर अफ कमर्सका अध्यक्ष राजेन्द्र मल्लले सुनचाँदी व्यवसायलाई परिष्कृत र पुरस्कृत गर्न जरुरी रहेको भन्दै सुनचाँदीमा लगाइएको दुई प्रतिशत थप सेवा शुल्क हटाउनै पर्ने  बताए । उनले सुनचाँदी व्यवसायमा अतिरिक्त कर नलगाउन मन्त्री समक्ष आग्रह गरे ।

नेपाल उद्योग वाणिज्य महासंघका वरिष्ठ उपाध्यक्ष अञ्जन श्रेष्ठले करका कारण बजारको माग घटाइएको बताए । उनले  आयात बढेको र निर्यात घटेकाले व्यापार घाटा चुलिएको बताए ।