अमेरिकी गए, चिनियाँ आउँदै, नेपालका शीर्ष नेताहरु सबै विदेश

७ साउन, काठमाडौं । अमेरिकाका मध्य तथा दक्षिण एसिया हेर्ने सहायक विदेशमन्त्री डोनाल्ड लुले नेपाल भ्रमण गरेको दुई साता नबित्दै उत्तरी छिमेक चीनबाट पनि उच्च तहको राजनीतिक आजबाट सुरु हुने भएको छ ।

चिनियाँ कम्युनिस्ट पार्टी (सीपीसी) का पोलिटब्युरो सदस्य युआन च्या च्युन तीन दिने भ्रमणका लागि आज दिउँसाे नेपाल आइपुग्नेछन् । उनीहरू नेपाल आउँदा प्रधानमन्त्री पुष्पकमल दाहाल, पूर्व प्रधानमन्त्री  केपी शर्मा ओली विदेशमा छन् । साथै पूर्व प्रधानमन्त्री माधव नेपालको पनि विदेश भ्रमण तय भइसकेको छ ।

गत पुस १० मा माओवादी अध्यक्ष पुष्पकमल दाहाल प्रधानमन्त्री भएपछि चीनबाट हुन लागेको यो उच्च स्तरको भ्रमण हो । युआन चीनका ठूलो र शक्तिशाली शहरहरूमध्ये एक छोङछिङ शहरको प्रतिनिधिमण्डल आज काठमाडौं आउन लागेका हुन् । युआन सीपीसीका २४ केन्द्रीय पोलिटब्युरो सदस्यमध्ये एक हुन । ७ जनाको स्थायी कमिटीपछि दोस्रो तहको शक्तिशाली तहका रूपमा पोलिटब्युरोलाई लिइन्छ ।

सीपीसीको सन् २०२२ मा भएको २० औं जनकंग्रेसले युआनलाई पोलिटब्युरो सदस्यको जिम्मेवारी दिएको थियो । उनी त्यसअघि सीपीसीको केन्द्रीय सदस्य थिए । उनी राष्ट्रपति सी चिनफिङका विश्वासिला पात्र मानिन्छन् । ‘अमेरिकी सरकारले मिलेनियम च्यालेन्ज कर्पोरेशन (एमसीसी) को कार्यान्वयनमा जोड दिएको छ, चिनियाँहरु पनि आफ्नो स्वार्थ अनुकूल आउन लागेको हुन’, परराष्ट्र मन्त्रालयका एक अधिकारीले भने ।

युआनले नेपालमा माओवादी अध्यक्ष तथा प्रधानमन्त्री दाहाल, कांग्रेस सभापति शेरबहादुर देउवा, एमाले अध्यक्ष केपी शर्मा ओली, एकीकृत समाजवादीका अध्यक्ष माधवकुमार नेपालसँग भेटवार्ता गर्ने कार्यक्रम थियो तर प्रधानमन्त्री इटाली र ओली कम्बोडिया भएका कारण यी दुई नेतासँग भेटघाट नहुने अवस्था छ । माधव नेपाल पनि विदेश जाने कार्यक्रम तय भैसकेकाले उनीसँगको भेटघाट पनि अलमलमै रहेको छ । नेपाल सोमबार इण्डोनेसिया जाँदैछन् ।

त्यसअघि उनको कार्यतालिका मिलाउन सचिवालय लागिपरेको छ । उनले राष्ट्रिय सभाका अध्यक्ष गणेश तिमिल्सिना र सभामुख देवराज घिमिरेलाई पनि भेट्ने छन् । युआनले केही मन्त्री, नेतासँग पनि भेटवार्ता गर्न सक्ने परराष्ट्रका एक अधिकारीले बताए । चीनले छिमेकी देशलाई उच्च प्राथमिकतामा राखेकै कारण यो भ्रमण हुन लागेको हो  ।

युआनको भ्रमणमा सीपीसी र नेपालका पार्टीहरू बीचको सम्बन्धका साथै बेल्ट एन्ड रोड इनिसिएटिभ (बीआरआई) अन्तर्गतका परियोजना कार्यान्वयन र चीनले अघि सारेका अन्य इनिसिएटिभका बारेमा पनि छलफल हुनेछ । चीनका राष्ट्रपति सी चिनफिङले सन् २०१३ मा अघि सारेको बीआरआई (पहिले वन बेल्ट वन रोड) अन्तर्गतका कार्यक्रमलाई प्राथमिकता दिए पनि नेपालमा प्रभावकारी रूपमा अघि बढ्न सकेको छैन । बेइजिङबाट यसअघि असार २७–३० मा सीपीसीको विदेश विभागको टोलीले नेपाल भ्रमण गरेको थियो । भ्रमणका क्रममा सीपीसी विदेश विभागका काउन्सिलर तु स्याउलिनले नेपाल र चीन मिलेर विकास गर्नुपर्ने बताएका थिए ।

चिनियाँ कम्युनिष्ट पार्टीका पोलिटब्युरो सदस्य तथा छोङछिङ शहरका पार्टी प्रमुख एवम् सचिव युआन च्या च्युन आउन अघि शनिबार पाँच जना सरकारी अधिकारीहरू काठमाडौं आइपुगेका छन् । उनीहरू एअर चाइनाको उडानबाट काठमाडौ आएका हुन् ।  सिङचियाङ लि,चिङचुन वाङ,चुन्सु लि, छिङयाङ पाई र छिउतिङ वेन नेपाल आएर युआनको भ्रमण कार्यतालिका र कार्यक्रम तय गरिरहेका छन् ।