दमक कांग्रेसले वीपीलाई यसरी सम्झियो !

७ साउन, काठमाडौं । ४१ औं वीपी स्मृति दिवसमा नेपाली कांग्रेसले दमकमा विविध कार्यक्रम गरेको छ । कांग्रेस दमक नगर समिति र प्रदेश सभा क्षेत्र ५ (ख) को संयुक्त आयोजनमा पार्टी कार्यालयमा आयोजित कार्यक्रममा कांग्रेस झापाका पूर्व सभापति एवं वि.पि. कोईरालाका अति प्रिय व्यक्ति जिजित आदर्श, झापाकै पूराना नेता पूर्णानन्द शर्माको प्रमुख आतिथ्यता रहेको थियो । उनले कांग्रेसले वीपि विचारलाई आत्मसाथ गरेर लोकतन्त्र र संविधानको रक्षा गर्नुपर्ने औंल्याए । नेता शर्माले कांग्रेस वीपी विचारबाट स्खलित हुन नहुने पनि बताए । 

कांग्रेस दमक नगर सभापति प्रकाश प्रसाइँको सभापतित्वमा सम्पन्न उक्त कार्यक्रममा जिल्ला उपसभापति शेरबहादुर भट्टराई सहित महाधिवेशन प्रतिनिधिहरु, जिल्ला सदस्यहरू, प्रदेश क्षेत्र, नगर तथा वडा समितिका पदाधिकारी सदस्यहरु, भातृ संघका नेताहरू लगायत कार्यकर्ताहरुको उल्लेखिय सहभागिता रहेको कांग्रेस दमक नगर उपसभापति युवराज खनाल सागरले नेपाल बहसलाई जानकारी दिए । 

कांग्रेसका प्रदेश सभा क्षेत्र (ख) का सभापति रवि न्यौपानेले स्वागत मन्तव्य राख्दै कांग्रेस भित्रको बलियो एकताले मात्रै पार्टीले सबै निर्वाचनहरू जित्न सक्ने भएको सत्यलाई सबै नेता, कार्यकर्ताहरुले आत्मसाथ गर्नुपर्ने औंल्याएका थिए । 

वडा वडामा वृक्षारोपण

सो अवसरमा नगर समितिले नगरका १० वटै वडाहरूमा  विभिन्न प्रजापतिका फलफूल, घाँसका विरुवाहरू उपलब्ध गराएको नगर सचिव आर.सी अधिकारीले जानकारी दिएका छन् । 

यसैक्रममा दमक ५ वडा समितिले दिपिनी आधारभूत विद्यालयमा वृक्षारोपण गरेको वडा सभापति चैतन्य बरालले जानकारी दिए । वृक्षरोपणमा पार्टीका जिल्ला उपसभापति शेरबहादुर भट्टराई, जिल्ला सदस्य, नगर तथा वडा समितिका नेता तथा कार्यकर्ताहरु सहभागी थिए । 

पार्टी कार्यालयमा रक्तदान

त्यसैगरी सोही अवसरमा कांग्रेस दमक ९ ले पार्टी कार्यालयमानै रक्तदान कार्यक्रम आयोजना गरेको थियो । पार्टीका वडा सभापति युवराज कोइरालाका अनुसार रक्तदानमा महाधिवेशन प्रतिनिधिहरु मेदनी प्रसाद सिटौला, अइन्द्रराज केरुङ, महिला नेतृहरु कल्पना राई, शान्ति पौडेल लगायत २५ जनाले रक्तदान गरेका छन् । नेपाल रेडक्रस सोसाइटी उपशाखा दमकको प्राविधिक सहयोगमा रक्तदान आयोजना गरिएको थियो ।