ललितानिवास जग्गा प्रकरणमा तत्कालीन नापीका कर्मचारी पक्राउ

७ साउन, काठमाडाैं । ललिता निवासको सरकारी जग्गा व्यक्तिको नाममा गरेको आरोपमा प्रहरीले थप एक जनालाई पक्राउ गरेको छ।केन्द्रीय अनुसन्धान ब्युरो 'सीआईबी'ले आइतबार थप एक जनालाई पक्राउ गरेको हाे । 

पक्राउ पर्नेमा तत्कालीन नापीका कर्मचारी अरूणकुमार श्रेष्ठ रहेका छन् । उनलाई प्रहरीले जोरपाटीस्थित घरबाट पक्राउ गरेको हो।सरकारी जग्गा व्यक्तिको नाममा गर्नमा उनले पनि भूमिका खेलेका प्रहरीले जनाएकाे छ । योसँगै यस प्रकरणमा पक्राउ परेका १९ जना सीआईबीको हिरासतमा छन्। 

ललिता निवासको १४३ रोपनी जग्गा विभिन्न चरणमा व्यक्तिको नाममा गएको देखिएको छ। सरकारी जग्गा हडपेको पाइएपछि प्रहरीले पुन: अनुसन्धान गरी  ललिता निवास प्रकरणामा सम्बन्धित व्यक्तिहरुलाई पक्राउ गर्न थालेकाे छ ।