सभापति देउवा र महामन्त्रीले कांग्रेस केन्द्रीय समितिमा उठेका प्रश्नको जवाफ दिने

८ साउन, काठमाडौं । नेपाली कांग्रेसको केन्द्रीय कार्यसमितिको बैठक आज पनि जारी रहने छ । बैठकमा अधिकांश केन्द्रीय सदस्यहरुले आफ्नो भनाइ राखिसकेका छन् । सानेपास्थित केन्द्रीय कार्यालयमा उक्त बैठक बस्नेछ । बैठक दिउँसो ३ बजे बोलाइएको छ ।
 
गत साउन २ गते देखी जारी केन्द्रीय समिति बैठकमा अधिकांस केन्द्रीय सदस्यहरुले धारणा राखिसकेका छन् । आजको बैठकमा बाँकी केन्द्रीय सदस्यहरुले धारणा राख्ने कार्यक्रम रहेको छ । सदस्यहरुको भनाइ सकिएपछि सभापति देउवाले सम्बोधन गर्नेछन् । 

नेपाली कांग्रेस प्रचार विभागका प्रमुख मीन विश्वकर्माका अनुसार सोमबार सभापति, उपसभापति र महामन्त्रीबाट बैठकमा उठेका प्रश्नहरूको जवाफ दिने क्रम सकिएपछि अर्को दिन बैठक राखेर पार्टीका निर्णय सार्वजनिक गरिनेछ । अदालतमा मुद्दा विचाराधीन भएको र पार्टीमा परम्परासमेत नभएकाले खाँणलाई निलम्बनको विषयबारे संस्थागत रूपमा कुनै धारणा नआउने उनको भनाइ छ ।

बैठक बस्नुअघिबाटै सभापति देउवाले खाँणको निलम्बनको विषयमा मौन रहने रणनीति बनाएका थिए । संस्थापन पक्षका एक सदस्यका अनुसार त्यही रणनीति बुझेरै संस्थापन पक्षका कतिपय सदस्यहरू बचाउमा र कतिपय मौन बसेका थिए । गच्छदार र गुरुङलाई निलम्बन नगर्ने, खाणलाई मात्रै किन निलम्बन गर्ने भन्ने कुरा संस्थापनपक्षीय सदस्यहरूको तर्क छ ।