सुन तस्करीमा अन्तर्राष्ट्रिय माफिया गिरोहको संलग्नता, शंकाको घेरामा शेयर खेलाडी राकेश अडुकिया !

८ साउन, काठमाडौं । राजश्व अनुसन्धान विभागले बरामद गरेको १ सय किलो सुन तस्करीको अन्तर्राष्ट्रिय माफिया गिरोहको संलग्नता तथा विचौलियामा नितान्त नयाँ गिरोहको संलग्नता देखिनसक्ने संभावना बढेको छ । जसमा केही बैंक तथा वित्तीय संस्था डुवाएर नयाँ व्यवसाय गरिरहेका व्यक्तिहरु यो गिरोहमा संलग्न हुनसक्ने स्रोतको दावी छ ।

केही समयअघि काठमाडौं फाइनान्समा गाभिएको गोरखा विकास बैंकलाई धराशायी स्थितिमा पुर्याउने ऋणीहरूमध्ये एक ऋणी  सुन तस्करीमा जोडिएको आशंका राजश्व अनुसन्धान विभागले गरेकाे छ । तिनी मध्येका एक व्यक्ति राजेश अडुकिया यतिबेला राजश्वको निगरानीमा परेका छन् । निगरानीमा परेका अडुकिया पछिल्लो पटक जुन २६ मा त्रिभुवन अन्तर्राष्ट्रिय विमानस्थलबाट भारत गएको देखिएको छ । त्यतैबाट हङकङ पुगेका उनी जुलाई ५ मा दुबई हुँदै नेपाल आएको देखिएको छ  । उनी नेपाल आएपछि हङकङबाटै नेपालमा सुन भित्रिएको थियो ।

शेयर खेलाडी समेत रहेका राकेश अडुकियाले बिगत लामो समयदेखि हङकङबाट चाँदीका नाममा सुन भित्र्याउँदै आएको प्रहरी स्रोतको भनाई छ । तर अनुसन्धान निष्कर्षमा नपुगेको भन्दै अधिकारीहरूले व्यापारीलाई पक्राउ भने गरेका छैनन् । अनुसन्धानमा तानिन सक्ने भयले उनका छोरा रोहन अडुकिया गत शुक्रबार दिल्लीतर्फ उडेका छन् भने बाबु राकेश पनि हङकङ जाने तयारीमा रहेको स्रोतको भनाई छ ।

राजश्व अनुसन्धान विभागले बरामद गरेको करिब सय किलो सुन प्रकरणमा हालसम्म १४ जना व्यक्ति र भन्सारका ३ जना कर्मचारीलाई नियन्त्रणमा लिएर अनुसन्धान शुरु गरेको छ । सय किलो सुन प्रकरणमा पक्राउ परेका चिनियाँ नागरिक जिक्वाङ लिङ एक वर्ष पहिले नै नेपाल आएको भन्दै बिहीबारै नेपालबाट चीन जान लागेको अवस्थामा पक्राउ गरेको थियो । विभागले उनीमाथि सुक्ष्म अनुसन्धान गरिरहेको छ ।  

नेपालमा पछिल्लो समय क्विन्टलका क्विन्टल सुन तस्करी हुन थालेको खुलेको छ । बुधवार राति १०० केजी सुन ‘ब्रेक सु’ मा लुकाएर ल्याइएकोमा बरामद भएपछि तस्करीको जालोबारे खुल्न थालेको हो । हङकङबाट आएको सुन राजधानीको रेडी ट्रेडर्सको नाममा थियो । सुन तस्करीमा चिनियाँ नागरिक मुख्य नाइके रहेको देखिएपनि यसमा अन्तर्राष्ट्रिय माफिया गिरोह संलग्न रहेको आशंका बलियो बन्दै गएको छ ।

अन्तर्राष्ट्रिय सो संगठित गिरोहमा चीन, भारत र नेपालका व्यापारीका साथै दुबई कनेक्सन देखिएको छ ।अन्तर्राष्ट्रिय माफिया डन दाउद गिरोहको संलग्नता हुनसक्ने आशंका भारतीय गुप्तचर स्रोतले गरेको छ । त्यस्तै सुन तस्करीमा नेपालका विभिन्न पार्टीका उच्च तहका नेता, कर्मचारी र प्रहरीसमेतको मिलेमतो हुनसक्ने अनुमान राजश्व अनुसन्धान विभागले गरेको छ । घटना खुले ठूलै पहिरो जाने भएकाले अनुसन्धानलाई माथिसम्म पुग्न नदिने चलखेल हुन थालेको स्रोत बताउँछ । हङकङबाट तस्करले सुन ल्याए पनि यसमा को को संलग्न छन् र सुन कसले मगाएको थियो भन्नेबारे अनुसन्धान भइरहेको विभागका महानिर्देशक नवराज ढुङगानाले नेपालबहसलाई बताए ।

विमानस्थलको भन्सारसमेत पार गराएर सिनामंगल सडकमा निकालिएको क्विन्टल सुन तस्करीमा चीनदेखि भारतसम्म विस्तारित गिरोह संलग्न भएको खुलेपनि हाईप्रोफाइल मानिसहरु पक्राउ पर्न सकेका छैनन्  । तस्करीमा संलग्न एक–एक जना भारतीय र चिनियाँ नागरिक पक्राउ परेका छन । सँगै आठ नेपाली पनि समातिएका छन् तर नेपाली मुख्य नाइके खोज्न अनुसन्धान भइरहेको राजश्वका अधिकारीहरूले जनाएपनि नेपाली नागरिक यही होे भन्ने बारेमा एकिन भएको छैन ।

बूढानीलकण्ठस्थित रेडी ट्रेडर्स प्रालिले स्कुटरको ‘ब्रेक सु’ का नाममा भन्सारबाट निकालिएको सामान राजश्व अनुसन्धान विभागले नियन्त्रणमा लिएको थियो । सुन बरामद भएपछि सो कम्पनीले यसअघि विभिन्न सामानहरु ल्याएको पाइएको छ  । त्यसमा सुन थियो कि थिएन भन्ने बारे अनुसन्धान पछि निष्कर्षमा पुगिने राजश्वका महानिर्देशक ढुङगानाको भनाई छ ।

नेपाल, भारत र हङकङमा व्यावसायिक आवरणमा तस्करी धन्दा चलाएको गिरोहले मे, जुन र जुलाईमा पटक–पटक गरी ३ हजार ८ सय ८१ थान सामान ल्याएको भन्सारको अभिलेखबाट उल्लेख छ । रेडी ट्रेडले २ हजार ७ सय थान सेभर (दाह्री काट्ने), एउटा मेकानिकल मोटर र १ हजार १ सय ८० थान ब्रेक सु नेपाल ल्याएको हो । ती सामान जाँचपासबाटै बाहिर निकालिएका थिए । जबकि ब्रेक शु भारतबाट नेपाल ल्याउदा नै सस्तो पर्छ ।