राजनीतिक रुपान्तरणका लागि कांग्रेसले महत्वपूर्ण निर्णय गर्छः महामन्त्रीद्वय

८ साउन, काठमाडौं । नेपाली कांग्रेसका महामन्त्री द्वय गगनकुमार थापा र विश्वप्रकाश शर्माले कांग्रेसको यो केन्द्रीय समितिको बैठकबाट देश र जनताका पक्षमा महत्वपूर्ण निर्णय आउने बताएका छन् । उनीहरूले देशलाई दलीय दुश्चक्रबाट बाहिर निकाल्नुपर्ने बताएका छन् ।

सोमबार बसेको केन्द्रीय समितिको बैठकलाई सम्बोधन गर्दै महामन्त्रीले राजनीतिक दलहरूले 'एग्जिट पोलिसी' बनाएको खण्डमा राष्ट्रपति, प्रधानमन्त्री, मन्त्री र सांसदहरु भइरहने प्रवृत्तिको अन्त्य हुने बताए । राजनीतिमा उमेर नभइ एजेण्डा महत्त्वपूर्ण हुने भए पनि महत्वपूर्ण पदहरुमा भने 'एग्जिट पोलिसी' राख्न जरुरी देखिएको उनीहरुको तर्क थियो ।

बैठकमा उठेका प्रश्नको जवाफ दिँदै शर्माले रुपान्तरणको अभियान भनेर केही साथीहरूले नै कार्यक्रम गरे तर, त्यहाँ कतिपय शब्द प्रयोग गर्दै गर्दा कमजोरी भएको बताए । उनले केही महत्वपूर्ण विषयहरू संगठनका लागि गरौं भनेर आएकाले त्यसलाई पनि कांग्रेसले ग्रहण गर्नुपर्ने बताए । उनले राजनीतिक रुपान्तरणको लागि एउटा 'एग्जिट पोलिसी' जरुरी रहेको र त्यो 'एग्जिट पोलिसी' भनेको धेरै वर्ष पहिला सभापतिले राजनीतिबाट राजीनामा दिनैपर्ने बताए । 

उनले भने, ‘केही वर्षअघि लहर चलेको थियो । ७० वर्ष नाघेकालाई राजनीतिबाट बिदा गर्ने भनिएको थियो । एज नभइ राजनीतिमा एजेण्डा हुनुपर्छ भनेर मैले भन्दा म आलोचित भएँ । हामीले एग्जिट पोलिसी राखेको भए शेरबहादुर दाईले जस्तो ५ पटक हुन्थेँ भन्ने सोच्दैन । त्यसैले एग्जिट पोलिसी आवश्यक छ ।’ यस क्रममा उनले विभिन्न नयाँ दलहरूले मिसन २०८४ सञ्चालन गरे पनि २०८४ मा २००७ सालको जस्तो क्रान्ति नभइ निर्वाचन मात्र हुने बताएका थिए ।

केन्द्रीय कार्यसमितिको सोमबारको बैठकमा आफ्ना धारणा राख्दै थापाले भने, ’दलीयकरणको दुश्चक्रबाट कांग्रेसले देशलाई निकाल्नुपर्छ । कम्युनिस्ट पार्टीसँग प्रतिस्पर्धा गर्ने क्रममा जहाँ पनि हाम्रो मान्छे राख्ने ।’ थापाले संस्था, विश्वविद्यालय, अड्डा अदालतमा आफ्ना मान्छे राख्ने कामबाट कांग्रेस बाहिर आउनुपर्ने बताए । उनले निजामती कर्मचारीसम्ममा आफ्ना मान्छे भनेर जानु ठीक नभएको बताए । 

संसदीय दलको नेता बदल्नका लागि आफू लागिरहेको महामन्त्री गगनकुमार थापाले बताए । प्रतिनिधिसभा सदस्यसमेत रहेका महामन्त्री थापाले गाह्रो भए पनि संसदीय दलको नेता बदल्न लागेको बताए । संसदीय दलको नेता फेर्न किन लागेको भन्ने प्रश्न नगर्न पनि थापाले सभापति तथा संसदीय दलका नेता देउवानिकटका नेताहरूलाई आग्रह गरेका छन् । ’मैले पार्टी फुटाउने कुरा गरेको हो र ? मैले त दलको नेता फेर्ने कुरा गरेको हो । म बदल्न लागिरहेको छु, सके बदल्छु नसके चुप लागेर स्वीकार्छु,’ उनले भने ।

सभापति तथा दलका नेता देउवालाई संसदीय दलको नेता फेर्ने कुरा नौलो नरहे पनि उनी निकट नेताहरूले भने प्रश्न गर्न लागेको थापाले बताए । ’सभापतिले आफू फेर्दै गरेकाले यसले प्रयास गर्छ भन्ने लागेको छ । अरूले कति चिन्ता गर्नुभएको हो ?,’ उनले प्रश्न गरे ।

संसदीय दलको नेता फेर्ने प्रयास गरिरहने थापाले बताए । उनले सांसदहरूको मत पाउने कुरा गाह्रो भएको बताए । मतदाताको बीचमा भोटिङ भए अर्कै कुरा हुनेथियो तर सांसदको मत पाउन झन् गाह्रो हुने बताए । गाह्रो काम भनेर संसदीय दलको नेता परिवर्तन गर्ने अभियानबाट पछि नहट्ने उनको भनाइ थियो ।