केन्द्रीय समितिले सार्वजनिक गर्ने निर्णय तयार पार्न देउवाले बोलाए निवास मै पदाधिकारीहरुको बैठक

९ साउन, काठमाडौं । नेपाली कांग्रेसका सभापति शेरबहादुर देउवाले आफ्नै निवास धुम्बाराहीमा पार्टी पदाधिकारीको बैठक डाकेका छन् । केन्द्रीय कार्यालय सानेपामा ६ दिनसम्म चलेको केन्द्रीय कार्यसमितिको बैठकका निर्णय तयार पार्नका लागि देउवाले पदाधिकारी बैठक बोलाएका हुन् ।

देउवानिवास धुम्बाराहीमा आज मंगलबार अपरान्ह ४ बजे पदाधिकारीको बैठक बस्ने कांग्रेसका मुख्यसचिव कृष्णप्रसाद पौडेलले जानकारी दिए । जारी केन्द्रीय समिति बैठकमा नेताहरूले सभापतिले पार्टी घरबाटै चलाएको बताएपनि सभापति देउवाले आजको पदाधिकारी बैठक पनि निवासमै बोलाएका छन् ।

आज तयार पारिने निर्णयका आधारमा सभापति देउवाले बुधबार बस्ने केन्द्रीय समिति बैठकमा आफूमाथि उठाइएका प्रश्नको जवाफसहित सम्बोधन गर्नेछन् । केन्द्रीय समिति बैठक भोलि बुधबार ४ बजे बस्ने गरी बोलाइएको छ ।