अब शेखर कोइरालाको नेतृत्वमा कांग्रेसलाई बहुमतको पार्टी बनाउने अभियानमा लाग्नुपर्छः कानुन मन्त्री धनराज गुरुङ

९ साउन, काठमाडौं । नेपाली कांग्रेसका उपसभापति धनराज गुरुङले वरिष्ठ नेता डा. शेखर कोइरालाको नेतृत्वमा कांग्रेसलाई बहुमतको पार्टी बनाउने अभियानमा सबै लाग्नुपर्ने बताएका छन् । उनले पार्टीको १५ औं महाधिवेशनमा कोइरालालाई सभापति बनाउने दाबीसमेत गरेका छन् ।

मंगलबार ४१ औं बीपी स्मृति दिवसको अवसरमा आयोजित कार्यक्रममा उनले आफूले कोइरालालाई रुपान्तरणको मुद्दा नसकिएको भन्दै सभापतिको लागि अघि बढ्न आग्रह गरे । उपसभापति गुरुङले अहिले नै सभापति बदल्न नसक्ने बताए । उनले नपुग्ने कुरा नगर्ने भन्दै अहिले नै पार्टी सभापति बदल्नुपर्छ भन्ने होइन तर १५ औं महाधिवेशनमा पार्टी सभापति बदल्ने अभियानमा लाग्नुपर्ने बताए । 

त्यो बेला शेखरलाई उम्मेदवार बनाउने मात्र होइन, सभापतिमा स्थापित गर्ने उनको दाबी छ । कानुन मन्त्री समेत रहेका उपसभापति गुरुङले नेताहरूको सम्पत्ति छानबिनका लागि आयोग बनाउनुपर्ने बताए । एकपछि अर्को फाइल खोल्दै जानुपर्छ भनेर आफूले प्रधानमन्त्रीलाई समेत भनेको उनले बताए ।

उनले भने, ‘डा.शेखर कोइराला अघि बढ्नुहोस् । मेरो पनि आकांक्षा होला सभापति पदमा तर, रुपान्तरण मुद्दा सकिएको छैन, तपाईँ अघि बढ्नुहोस् भनेको छु । प्रस्ट रूपमा भन्छु खरो ढंगबाट पार्टीको रुपान्तरण अभियानमा १५ औं महाधिवेशनमा सभापति बन्ने हो ।’  

 

उनले बीपी कोइरालाको पद चाप पहिल्याउनुपर्ने बताए । बीपीको पद चाप पहिल्याउनु पर्छ, हिँड्नै पर्छ । हामीले कांग्रेसलाई बहुमतको पार्टी बनाउनु छ । यो मुलुक र जनताको लागि डेलिभरी दिन आवश्यक छ । जनमतका लागि राजनीति गरेका छौँ भनेर हिँड्नुपर्छ, उनले भने, हामी अलमलिएका छौं कि ठीक छ ? रुपान्तरण गर्ने नै हो । सिङ्गो मुलुकको रुपान्तरण अघि पार्टीको रुपान्तरण हुन्छ । सूरूमा आफैँ रुपान्तरण गर्नुछ । आफैँ न बदल्नेले पार्टी र देशको मुहार बदल्न सक्दैनौं ।’