डीएसपी ठगबहादुर केसी बर्खास्त

९ साउन, काठमाडौं । इलाका प्रहरी कार्यालय बुटवलमा कार्यरत डीएसपी ठगबहादुर केसी बर्खास्तमा परेका छन् । गृहमन्त्रालयले डीएसपी ठगबहादुर केसीलाई बर्खास्त गरेको हो । ३५ तोला सुनसहित पक्राउ परेका डीएसपी केसीलाई सोमबार बर्खास्त गरेको पत्र गृहमन्त्रालयले प्रहरी प्रधानकार्यालयमा पठाएको छ  । 

मन्त्रालयले भविष्यमा सरकारी सेवामा अयोग्य नठहरिने गरी उनलाई बर्खास्त गरेको पत्र प्रहरी प्रधानकार्यालयमा पठाएको छ । ‘उहाँलाई बर्खास्त गरेको पत्र प्रहरी प्रधानकार्यालयमा आएको छ’, प्रहरी प्रवक्ता डीआईजी कुवेर कडायतले भने । प्रहरी प्रधान कार्यालयले डीएसपी केसीलाई जागिरबाटै हटाउन गृह मन्त्रालयमा सिफारिस गरेको थियो । यसअघि केसीविरुद्ध प्रहरी प्रधान कार्यालयले छानबिन गरेको थियो । छानबिनका क्रममा डीएसपी केसीले गम्भीर गल्ती गरेको देखिएपछि बर्खास्तका लागि सिफारिस गरेको थियो । 

इलाका प्रहरी कार्यालय बुटवलमा कार्यरत डीएसपी गत पुस ११ गते डीएसपी केसी ३५ तोला सुनसहित पक्राउ परेका थिए । सो विषयमा तत्कालिन एसएसपी चन्द्रकुवेर खापुंगको नेतृत्वमा छानविन समिति बनाइएर प्रहरी प्रधानकार्यालयले अनुसन्धान गरेको थियो । समितिले केसीले गम्भीर गल्ती गरेको निस्कर्षसहित निकालेको थियो ।

प्रहरी प्रधानकार्यालयको सिफारिसमा बर्खास्तमा परेका उनी दोस्रो डीएसपी हुन यसअघि रुपकुमार न्यौपाने बर्खास्तमा परेका थिए । धनुषमा कार्यरत न्यौपानेलाई सशस्त्र समूहसँग मिलेको आरोप पुष्टि भएपछि शुरुमा घटुवा र पछि बर्खास्त गरिएको थियो ।