प्रधानमन्त्री फर्कदासम्म सुन तस्करीका मुख्य अभियुक्त नसमातिए सदनमै आमरण अनशन बस्छु: शर्मा

१० साउन, काठमाडौं । नेपाली कांग्रेसका सांसद सुनील शर्माले सुन प्रकरणमा संलग्न मुख्य अभियुक्तलाई पक्राउ नगरे आफू संसदमै आमरण अनशन बस्ने चेतावनी दिएका छन् । उनले प्रधानमन्त्री पुष्पकमल दाहाल प्रचण्ड विदेशबाट फर्किँदासम्म मुख्य नाइके नसमातिए संसदमा आमरण अनसन बस्ने बताएका छन् । 

प्रतिनिधिसभाको बुधबार बसेको बैठकमा बोल्दै सांसद शर्माले सुन प्रकरणमा गृहमन्त्री नारायणकाजी श्रेष्ठ र अर्थमन्त्री प्रकाशशरण महतले नैतिकताका आधारमा राजीनामा दिनुपर्ने माग गरे । उनले दुई छाक भात खान नपाएर सडकमा हिँडेका नेपालीहरूले हेरिरहेका बेला काठमाडौं विमानस्थलबाट क्विन्टलका क्विन्टल सुन आउँदा पनि पक्डन नसक्नु भनेको हामी सबै त्यो दोषी भएको बताए । 

उनले भने, ’यो चिजलाई गुपचुप पारेर त्यो गाउँको बिचरा भरियालाई मात्रै हिरासत राख्ने र मुख्य नाइकेहरू भाग्छन् र अर्थमन्त्री र गृहमन्त्रीले त्यही भुजेललाई मात्रै पक्रेर बस्छन् भने प्रधानमन्त्री फर्केपछि उहाँहरूले तोकेको मितिभित्र भरिया मात्रै पक्राउ पर्छ भने यो सदनभित्र म आमरण अनशन घोषणा गर्न चाहन्छु ।’