ओमनिया क्लब घटना: ‘इन्काउण्टर’बाट बाँचेका गुण्डा नाईके सानुभाई

११ साउन, काठमाडौं । ठमेलको ओमनिया क्लबमा कुटपिट भएको घटनालाई लिएर त्यसमा संलग्न रहेका सानुभाई भनिने युवराज गुरुङ ‘इन्काउण्टर’ बाट बालबाल बचेको खुलेको छ । उपत्यका अपराध अनुसन्धान कार्यालयका प्रहरी अधिकारीले गुरुङलाई जहाँ भेटे पनि ‘इन्काउण्टर’ गरिदिने अनुमतिसहित प्रहरी टोली खटिएको तर त्यसअघि नै काठमाडौं परिसरबाट खटिएको प्रहरीले पक्राउ गर्दा उनी बचेका हुन् ।  

ठमेलका क्लबहरूमा गएर पैसा माग्दै कुटपिट गर्ने, हप्ता असुली गर्ने गरेका घटनाहरू बाहिर सार्वजनिक भइरहेका बेला ठमेलको ओमनिया क्लबमा भएको कुटपिटमा प्रहरीले युवराज गुरुङसहितका ६ जना मुछिएपछि अपराध अनुसन्धान कार्यालयको टोलीले इन्काउन्टरको नाममा सफाया गर्ने नीति लिएको थियो ।

सुरुमा काठमाडाैं प्रहरीले घटनामा चासो नदिएकोमा कुटपिटको सीसी क्यामेरा फुटेज बाहिरिएपछि मात्र प्रहरीको चासो बढेको थियो । यो घटनाका नाइके युवराज पहिला कुमार घैंटे समूहमा आबद्ध थिए । घैंटे इन्काउन्टरमा मारिएपछि उनी बुलेटप्रुफ ज्याकेट लगाएर हिँड्थे । अहिले कांग्रेस नेताहरूको संरक्षणमा फेरि उनले गुण्डागर्दी सुरु गरेका हुन् । हालका अर्थमन्त्री प्रकाशशरण महत लगायतले उनलाई संरक्षण गर्दै आएको स्रोतको दावी छ ।

उनले ठमेल क्षेत्रमा आतंक मच्चाउन लागेको भन्दै प्रहरीले घैटेकै शैलीमा सिध्याइदिन लागेको स्रोतको दावी छ । उनीबाहेक अहिले प्रहरीकै संरक्षणमा काभ्रेली समूहले पनि ठमेलमा आतंक मच्चाउन थालेको छ । गत २५ साउनमा काभ्रेली समूहले पनि एक क्लबमा कुटपिट गरेको थियो । जसमा तीन जनालाई प्रहरीले पक्राउ समेत गरेको थियो । तर, सोह्रखुट्टे वृत्तले सेटिङमा मुद्दा नचलाई छाडिदिएको छ । स्रोतका अनुसार सोह्रखुट्टे वृत्तका डीएसपी गणेश बमले कांग्रेस नेता तीर्थ लामा लगायतको दवावमा उनीहरूलाई  छाडेका स्रोतको दावी छ ।  

पक्राउ पर्नेमा तेमाल गाउँपालिकाका एक वडाअध्यक्ष समेत थिए । उनीहरूलाई छाड्दा ठूलै आर्थिक चलखेल भएको स्रोतको दावी छ । यस्तै गुरुङको हकमा पनि अपराध अनुसन्धान कार्यालयका प्रहरीले इन्काउण्टर गर्न खोजेको सूचना पनि उनै डीएसपी बमले चुहाएको आशंका गरिएको छ । सोह्रखुट्टेका डीएसपी बम र गुरुङको पनि साँठगाँठ रहेको बताइएको छ । उनीहरूबीच पुरानो चिनजान रहेकाले गुरुङले ठमेल क्षेत्रमा उनै बमको आड भरोसामा कब्जामा लिन खोजेको त्यहाँका व्यापारीहरूले बताएका छन् । ‘ काठमाडाैं परिसर प्रहरीले गुरुङलाई पक्राउ गरेर मात्र बचेको हो नत्र सिध्याउने नीति थियो’, प्रहरी स्रोतले भन्यो । परिसरको टोलीले पोखराबाट पछ्याएर थानकोट आइपुगेपछि उसलाई पक्राउ गरेको थियो ।

पक्राउ पर्नेमा सानुभाइसहित टोखा घर भएका ३३ वर्षीय विक्रम अधिकारी, तनहुँ दमौलीका ३२ वर्षीय सुवास कायस्थ, तनहुँ दमौलीकै ३० वर्षीय सुरज कायस्थ र नुवाकोट पञ्चकन्या–५ का कमल तामाङ छन् । सानुभाइ समूहका विनोद लामा र रघु लामालाई प्रहरीले घटना भएको दिन नै पक्राउ गरेको थियो ।

असार १५ मा क्लब प्रवेश गर्दा आफूलाई ‘सम्मान भएन’ भनेर युवराज गुरुङ सानुभाइसहितका युवाहरूले क्लब सञ्चालक राजेन्द्र गुरुङ, बाउन्सर र कर्मचारीलाई कुटपिट गरेर भागेका थिए । उनीहरूमाथि रेष्टुरेण्ट तथा लाउन्जहरुमा गएर लाखौँ रूपैयाँको खानपिन गर्ने र बिल तिर्ने बेला कर्मचारी तथा क्लब सञ्चालकहरुमाथि कुटपिट तथा तोडफोड गरेको आरोप छ ।