गरीब विपन्नहरुको निःशुल्क उपचारका लागि सरकार प्रतिवद्ध छ : मन्त्री बस्नेत

१२ साउन, काठमाडौं । स्वास्थ्य तथा जनसंख्यामन्त्री मोहनबहादुर बस्नेतले, गरीब तथा विपन्नको निःशुल्क उपचारका लागि सरकार प्रतिवद्ध रहेको दोहोर्याएका छन् । 

शुक्रबार वीर अस्पतालको १३४औँ वार्षिकोत्सव कार्यक्रममा उनले, नेपालको संविधानले मौलिक हकको रुपमा व्यवस्था गरेको नागरिकलाई निःशुल्क स्वास्थ्य सेवा पुर्याउने कुरामा सरकार प्रतिवद्ध रहेको बताए ।  अहिलेसम्म व्यवहारमा लागु हुन नसकेको नि शुल्क उपचारको व्यवस्था कार्यान्वयनको सुरुवात गरीब तथा असहायबाट गरिएको बताए । 

उनले भने ‘नेपालको संविधानले शिक्षा र स्वास्थ्यलाई जनताको आधारभूत विषयमा व्याख्या गरेको छ । यो निःशुल्क हकको रुपमा हामीले कायम गरेका छौं । तर वास्तवमा त्यस्तो हुन सकिरहेको छैन् । म मन्त्री भएको हैसियतले यो भन्न लाज मान्नु पर्ने कुनै कारण छैन् । अब कसै न कसैले सुरुवात गर्नु पर्छ । ’

सरकारी अस्पतालले केही हद सम्म यो कार्यन्वयन गरेको दाबी गर्दै उनले अब निजी अस्पतालले पनि सो नियम पालना गर्नु पर्ने उनको भनाई छ। उनले वीर अस्पतालले ५ लाख विरामीलाई उपचार दिँदा १ लाख विरामीलाई निःशुल्क उपचार गरेको भन्दै उनले प्रशंसा गरे ।