सडकमाथिबाट पहिरो खसेपछि मुग्लिन–नारायणगढ सडक खण्ड फेरि अवरुद्ध

१४ साउन, चितवन । चितवनको मुग्लिन–नारायणगढ सडक खण्ड फेरि अवरुद्ध भएको छ । आज बिहान करिब पौने १० बजेदेखि सडक अवरुद्ध भएको हो ।

इच्छाकामना गाउँपालिका–६, कालीखोला पुलनजिकै सडकमाथिबाट पहिरो खसेकाले बाटो अवरुद्ध भएको सडक डिभिजन कार्यालय भरतपुरले जनाएको छ ।

उक्त स्थानमा अहिले वर्षा भइरहेको र लेदो पनि बगिरहेको सो कार्यालयका सूचना अधिकारी चण्डेश्वर साहले जानकारी दिए । पहिरो पन्छाउनका लागि सडक डिभिजनको मेसिन तयारी अवस्थामा रहेको उनले जानकारी दिए । 

लेदो खसिरहेकाले सो स्थानमा सवारीसाधनको आगमन ठप्प भएको उनले बताए । सोही स्थानमा हिजो पनि केही समय सडक अवरुद्ध भएको थियो ।