प्रहरीको अर्ब बढीको सामान खरिदमा शक्तिकेन्द्रको चलखेल

१४ साउन, काठमाडौं । प्रहरी प्रधान कार्यालयले आगामी वर्षका लागि लत्ता कपडा, जुत्ता, पार्कर ज्याकेट र झुल तथा अन्य सामग्री खरिदको तयारी गरिरहँदा प्रबन्ध शाखामा कसलाई पठाउने भन्ने बारेमा चलखेल सुरु भएको छ । गृहमन्त्रालय र माओवादी केन्द्र, अन्य शक्तिकेन्द्र तथा नेपाल प्रहरीमा ठेक्का गरिरहेका ठेकेदारहरूले आफ्नो अनुकुलको प्रहरी अधिकारीहरूलाई त्यहाँ पठाउन प्रहरी महानिरीक्षक (आईजीपी) बसन्त कुँवरलाई दबाब दिएकाे समाचार स्राेतले दावी गरेकाे छ ।

प्रबन्ध शाखाका रहेका डीआईजी र स्टोर दाखिला तथा सामान रुजु गर्ने डीएसपीकै कारण सबै आर्थिक हिसाब किताब मिल्ने भएकाले यी दुई पदमा माओवादी केन्द्र निकट रहेका केही ठेकेदारले आँखा लगाएकाे स्राेतकाे भनाइ छ । उनीहरूले पार्टी च्यानल प्रयोग गरेर नारायणकाजी मार्फत माओवादी निकट मानिएका कर्मचारीलाई प्रबन्ध र आर्थिक प्रशासन शाखामा ल्याउन दबाब दिइरहेकाे बताइएकाे छ । हाल त्यहाँ रहेका एसपी गोविन्द पुरीलाई नसार्न माओवादीका विभिन्न नेताहरूले दबाब दिइएको स्रोतको दावी छ । साथै विगतमा एमाले कांग्रेस मिलाउन सफल रहेका डीआईजी केदार ढकाललाई पनि नसार्न माओवादीको समूह लागेको छ ।

यस्तै गृहमन्त्री श्रेष्ठका दाजु मानकाजी श्रेष्ठ र अघोषित सल्लाहकार पूर्व एआईजी वीरेन्द्र बाबु श्रेष्ठले त्यहाँ भएकाहरूबाट ‘आउटपुट’ आउन नसक्ने भन्दै ‘एसम्यान’को खोजी गरिरहेकाे दावी गरिएकाे छ । डीआईजी ढकाल र एसपी पुरी प्रबन्ध शाखामा पुगिसकेका छन् । त्यस्तै आर्थिक प्रशासन शाखाले त्यहाँ रहेका कर्मचारी मध्ये केहीलाई सरुवा गरेर निकटलाई ल्याएको स्रोतले जनाएको छ ।

अहिले प्रशासन विभागका प्रमुख एआईजी दीपक थापा नेतृत्वको आर्थिक प्रशासन तथा प्रबन्ध निर्देशनालय चलेको छ । उनी माओवादीलाई सहयोग गर्ने प्रहरी अधिकारी मानिन्छन् । मकवानपुर, चितवन लगायतका जिल्लामा बस्दा उनले माओवादीलाई सहयोग गरेको बताइन्छ । अहिले पनि गृहमन्त्री श्रेष्ठले एआईजी थापालाई प्रशासन प्रमुखको जिम्मेवारी दिएका छन् । गत मंगलबार मात्रै आर्थिक बर्षको लागि चुस्ता, डीएमएस बुट, ऊलन सर्ट–पाइन्टको कपडा, पार्का ज्याकेट, स्लीपीङ ब्याग, ऊलन स्वीटर, स्पोर्ट जुत्ता, मिन्क ब्लाङ्केट, अन्डर ट्राउजर भेष्ट सेट खरिदको बोलपत्र साउनको प्रकाशित गरेको छ ।

त्यस्तै, पन्चु, मस्वीटोनेट (झुल), ट्रयाकसुट, रुकस्याक ब्याग, ब्लू डांग्री क्लोथ, ब्यारेट क्यापसहित १९ वटा सामानको बोलपत्र निकालेको छ । सबैभन्दा बढी बजेट चुस्ता र बुटमा हुन्छ । चुस्तामा करिब सवा १६ करोड र बुटमा ११ करोड बजेट छ । त्यस्तै पार्का ज्याकेट ६ करोड, ऊलन सर्ट ७ करोड ७५ लाख, स्पोर्ट जुत्तामा ६ करोड, ट्रयाकसुटमा ८ करोड गरी सबै लत्ताकपडामा यसपटक करिब १ अर्बभन्दा बढीको बजेट रहेको छ । विगतमा ७२ करोडको खरिद भएको थियो । प्रहरीभित्र निकै विवादित मानिएका एसपी पुरीले यसअघि एक व्यक्तिलाई पक्राउ गरि हिरासत भित्रै ७ लाखको चेक काट्न लगाएर गम्भीर अपराध गरेको आरोप  हुँदा पनि उनलाई छानविन नगरी प्रबन्ध शाखामा सरुवा गरिएको थियो । उनले तीन लाख रूपैयाँ ऋण लिएका ती व्यक्तिलाई पक्राउ गरि ७ लाख रूपैयाँको चेक काट्न लगाएका थिए ।

विगतमा निकै विवादित मानिएको प्रबन्ध शाखाबाट करोडौं घोटाला भएको थियो । व्यापारीहरू पिताम्बर मुन्का, राजमान मिश्र, ज्ञानेन्द्र बस्नेत लगायतको टिमले घोटाला गरेको थियो । त्यस बेला उनीहरूसँग एसपी प्रेम बस्नेत र डीएसपी मदन केसी मिलेका थिए । तर उनीहरूलाई कुनै कारबाही भएन । सर्वेन्द्र खनाल र ठाकुर ज्ञवाली आईजीपी हुँदा उनीहरूले कम गुणस्तरको कपडा ल्याएको भन्दै अस्वीकार गरेको लत्ता कपडालाई शैलेश थापा आईजीपी भएपछि उक्त कपडा लिने गरी भण्डारका डीएसपी मदन केसी र प्रबन्धका एसपी प्रेम बस्नेतले सबै सेटिङ मिलाएर लिएका थिए । सो प्रकरणमा पछि मुन्का कारबाहीमा परेका भएपनि एसपी बस्नेत र डीएसपी केसीलाई भने उन्मुक्ति दिइएको थियो ।

प्रहरीले यसपटक सशस्त्र प्रहरीको सिको गर्दै हिमाली जिल्लामा बस्ने प्रहरीका लागि पनि छुट्टै कपडा खरिद गर्ने भएको छ । सशस्त्र प्रहरी बलले हिमाली जिल्लामा काम गर्ने जनशक्तिका लागि ३५ करोड बराबरको हिमाली सामानहरू खरिद गरेपछि नेपाल प्रहरीले पनि त्यसलाई अनुशरण गर्दै त्यसका लागि छुट्टै टेण्डर गर्ने भएको हो । प्रहरीले हिमाली जिल्लामा खटिनेका लागि भनेर हिमाली आइटम खरिदको टेण्डरमा त्यसको स्फिकेशन मिलाउन ठेकदारहरु लागि परेको र त्यसका लागि दिनदिनै प्रबन्ध शाखामा डीआईजी र एसपीसँग बैठक गर्ने गरेको स्रोतको दावी छ ।