सुन तस्करीको जालोमा माओवादीका नेताहरु अनुसन्धान जोखिममा पर्ने संकेत !

१५ साउन, काठमाडौं । राजस्व अनुसन्धान विभागले काठमाडौंको ठमेलबाट साउन १४ मा चिनियाँ मूलका बेल्जियमका नागरिक दावा छिरिङलाई पक्राउ गरेसँगै सुन तस्करीमा माओवादी केन्द्रका उच्च नेताहरुमाथि अनुसन्धानको दायरा फराकिलो हुन देखिएको छ । सत्ता गठबन्धन त्यसमा प्रधानमन्त्रीकै पार्टीका उच्च नेताहरूमाथि अनुसन्धान गर्नुपर्ने अवस्था आइपरेको हो ।

‘सुन तस्करीसँग सम्बन्ध देखिएपछि पक्राउ परेका दावा छिरिङको राजनीतिक कनेक्सन देखिएको छ’, विभाग स्रोतले भन्यो । तर उनीमाथि अनुसन्धान गर्दै जाँदा माओवादीको उच्च घरानीया समेत पर्ने अवस्था आएमा प्रधानमन्त्रीकै तहबाट अनुसन्धान रोकिने संभावना समेत बढेको छ ।  त्रिभुवन अन्तर्राष्ट्रिय विमानस्थलबाट भित्रिएको करीब एक क्विन्टल सुन साउन ३ मा बरामद गरे यता चलिरहेको अपरेसनको यो सबैभन्दा महत्त्वपूर्ण ‘क्लू’ हुने गरी विभागले दावालाई पक्राउ गरेको हो ।

उनी रोल्पाली ज्वाई भएको र रोल्पा रुकुमका धेरै माओवादी नेताहरुसँग उनको सम्बन्ध देखिएको छ । रोल्पाकी अमला रोकासँग बैबाहिक सम्बन्ध गाँसेका दावा छिरिङले माओवादी नेताहरूको कोठा चोटामा पुग्न मात्र होइन आफ्नो धन्दालाई उनीहरूमार्फत् वैधानिकता दिँदै आएका छन् ।

ठमेलबाट पक्राउ परेका दावा चिनियाँ आपराधिक गिरोहलाई नेपाल ल्याउने एजेन्ट  हुन्, उनको ‘कनेक्सन’ नेकपा (माओवादी केन्द्र)का नेताहरूसँग देखिन्छ । आइतबार उनलाई विभागको टोलीले पक्राउ गरी अनुसन्धान सुरु गरेको छ । उनीसँगै सुन तस्करीको आरोपमा पक्राउ पर्नेको संख्या १८ पुगेको छ । यद्यपि अधिकांश भरिया वा सहयोगी तहका मात्रै छन् । तस्करी गराउने व्यक्तिहरूको तहतर्फ अनुसन्धान पुगिनसकेकाले दावाको पक्राउले गिरोहको उपल्लो तहमा उक्लन सहज हुने अनुसन्धानमा संलग्न अधिकारीहरूको भनाइ छ । विभागले गोदाम, सुन गाल्ने मशिन लगायत सामान बरामद गरेकाले तस्करीमा ठूला व्यापारी र राजनीतिक व्यक्तिको संलग्नता हुन सक्ने उनीहरूको अनुमान छ । तर, दावा पक्राउसँगै राजनीतिक तहमा भएको तस्करीको खुलासा हुने भएपछि अनुसन्धान रोकिन सक्ने जोखिम बढेको छ ।

गृहमन्त्री नारायणकाजी श्रेष्ठले सुन तस्करीमा जो जो भएपनि अनुसन्धान हुने बताइरहेका बेला माओवादीका उपाध्यक्ष कृष्णबहादुर महरा र उनका छोरा राहुल महरा मुछिएका छन् । त्यसैगरी पूर्व उपराष्ट्रपति नन्दबहादुर पुन र उनका छोरा दीपेश पुन मुछिएका छन् । यस्तै वर्षमान पुन र उनकी श्रीमतीले पनि दावा छिरिङसँगै बसेर खाना खाएका तस्वीरहरु सार्वजनिक भएका छन् । बिमानस्थलबाट इसिगरेटभित्र लुकाएर गरिएको ९ किलो सुन तस्करीमा नाम जोडिएपछि  महराले सार्वजनिक रुपमा क्विन्टल सुन तस्करीमा धेरै ठूला माछाहरु रहेको बताएका थिए ।

‘सुन तस्करीमा धेरै ठूला माछा छन, समय क्रममा सबै बाहिर आउँछ, हामी त फगत पात्र मात्रै हौं, हामी त भुरे भारे हौं,’ महराले एउटा विद्युतीय सञ्चार माध्यमलाई भनेको भिडियो भाइरल भएको छ । आफू र छोरामाथि सुन तस्करीमा आरोप लागेको र संलग्नता देखिएको बेला महरा आफैले आफूहरु भुरेभारे माछा भनेर आरोप स्वीकार गरेका छन् । सुन तस्करी गरेको सार्बजनिक रूपमा नै स्विकार गर्ने महरासँग सरकारले अहिलेसम्म सोधपुछ गरेको छैन ।

महराको यो भनाईले तस्करीको सञ्जाल राज्य संरक्षित नै रहेको भने प्रष्ट पारेपनि गृहमन्त्रीको सुशासनको भाषणले सुन तस्करीको अनुसन्धानमा लाज मानिरहेको छ । प्रधानमन्त्री पुष्पकमल दाहालले गृहमन्त्रीलाई समेत थाह नदिई राजश्व अनुसन्धान विभागबाट छापा हान्न लगाएर अनुसन्धानको जिम्मा दिएपछि प्रहरी समेत अनुसन्धानको घेराबाट बाहिरिएको थियो । संगठित अपराधमा अनुसन्धानमा तालिम प्राप्त निकाय प्रहरीको केन्द्रीय अनुसन्धान ब्यूरोलाई बाहिर राखेर एक जना एसपीको भरमा अनुसन्धान पार लगाउन खोज्नुलाई यो अनुसन्धान अघि बढ्दै न कि भन्ने आशंका जन्मेको छ ।

विभागको टोलीले काठमाडौंको ठमेलस्थित होटल भियनामा छापा मारेर दावालाई पक्राउ गरेपछि राजनीतिक कनेक्सन देखिदा अनुसन्धानमै अप्ठेरो परेको आशंका पनि गर्न थालिएको छ ।  राजश्वले छापा हानेको भियना होटल जुन चिनियाँ आपराधिक गिरोहले सञ्चालन गरेको भनी एक वर्षअघि पनि खुलेको थियो ।

यसअघि २०७९ साउन ११ गते पनि प्रहरीले यस होटलमा छापा मारेको थियो । ठगीको आरोपमा चार चिनियाँ नागरिकलाई पक्राउ गर्दा २६ वटा ल्यापटप, ४७२ वटा मोबाइल, एक लाख ९० हजार मूल्य बराबरको सिम कार्ड बरामद भएको थियो । मञ्जिल श्रेष्ठ र अमला रोकाले घरधनी रत्नमान श्रेष्ठसँग होटल चलाउन सम्झौता गरेको भएपनि त्यो होटल अमला रोकाको चिनिया पति दावा छिरिङको लगानी र व्यवस्थापनमा चल्दै आएको छ ।  

माओवादी उपमहासचिव वर्षमान पुन र ओनसरी घर्ती , नन्दबहादुर पुन र उनको परिवारसँग पारिवारिक सम्बन्ध भएकी व्यक्ति हुन् । ‘माओवादीको राजनीतिक घरानासँग सम्बन्ध भएकै कारण गृहमन्त्रीले यसलाई छानवीन गर्न सक्ने अवस्था छैन’, माओवादी केन्द्रका एक नेताले  भने । नेपालको काभ्रेबाट नेपाली नागरिकता लिएको र नेपाली पासपोर्टबाट बेल्झिएम पुगेको तथा बेल्झियमबाट त्यहीको पासपार्ट लिएर नेपाल आएका थिए । दोहोरो नागरिकता र अपराधमा संलग्न भएको विषयमा नेपाल प्रहरीको विशेष व्यूरोले अनुसन्धान गरिरहेका बेला उनी भागर चिन गएका थिए ।  

विगतमा राजनीतिक संरक्षणका कारण जोगिँदै आएका दावा दोहोरो नागरिकता र राहदानीका विषयमा अनुसन्धान शुरु भएपछि वैशाख ५ गते (१८ मार्च, २०२३) मा सिचुआन एअरलाइन्सको फ्लाइटबाट चीन गएका थिए । त्यतिवेला प्रहरीले पनि उनको खोजी थालेको थियो । राजनीतिक संरक्षण पाएका उनी एक महीना चीनमा बसेपछि सुटुक्क नेपाल आएका थिए । दावा चीनबाट जेठ २० गते (२० मे, २०२३) नेपाल आएको त्रिभुवन अन्तर्राष्ट्रिय विमानस्थलस्थित अध्यागमन कार्यालयले जनाएको छ । उनी नेपालमा अवैध धन्दामा लागेको तथ्य २०७६ सालमै खुलेको थियो ।

त्यति खेर प्रहरीले काठमाडौंबाट १२२ जना चिनियाँलाई अनलाइन ग्याम्ब्लिङ, म्याच फिक्सिङ र अश्लील भिडिओ देखाएर चीनमा रहेका व्यक्तिबाट रकम असुलेको आरोपमा पक्राउ गरेपछि उनको संलग्नता खुलेपनि उनी भने राजनीतिक आडमा पक्राउ पर्न सकेका थिएनन । अहिले पनि सुन तस्करीमा उनी देखिएपछि विभागलाई दबाब परेको महशुस गर्न थालिएको छ ।