विभिन्न स्थानबाट लागुऔषधसहित १३ जना पक्राउ

१५ साउन, काठमाडौं । देशका विभिन्न स्थानबाट लागुऔषधसहित १३ जना पक्राउ परेका छन् । कैलालीका विभिन्न तीन ठाउँबाट अवैध लागूऔषध खैरो हेरोईन जस्तो देखिने पदार्थसहित चार जनालाई आइतबार प्रहरीले पक्राउ गरेको छ ।

उनीहरूमध्ये धनगढी उपमहानगरपालिका-२ बस्ने २७ वर्षीय योगेश कुँवर र सोही उपमहानगरपालिका-१ बस्ने २६ वर्षीय कुनाल खड्कालाई करिब ३ सय ५० मिलिग्रामसहित धनगढी उपमहानगरपालिका-२ सन्तोषी टोलबाट, जोशिपुर गाउँपालिका-६ सिमरी बस्ने १९ वर्षीय अर्जुन बडायकलाई करिब ३ सय मिलिग्रामसहित सोही ठाउँबाट र टिकापुर नगरपालिका-७ बस्ने २० वर्षीय राम सुरेश चौधरीलाई करिब १ ग्राम अवैध लागूऔषध खैरो हेरोईन जस्तो देखिने पदार्थसहित भजनी नगरपालिका-५ कव्वाखेडा घाटबाट प्रहरीले पक्राउ गरेको हो । 

झापाको दमक नगरपालिका-५ नारायण गोपाल टोल डेरा गरी बस्ने गौरादह नगरपालिका-५ घर भएका २७ वर्षीय सरोज सुब्बा समेत ३ जनालाई अवैध लागूऔषध ब्राउनसुगर जस्तो देखिने पदार्थ करिब ८ ग्रामसहित आइतबार दिउँसो इलाका प्रहरी कार्यालय दमकबाट खटिएका प्रहरीले पक्राउ गरेको छ ।

यसैगरी मेचीनगर नगरपालिका-६ स्थित मेची पुल छेउबाट अवैध लागूऔषध खैरो हेरोइन जस्तो देखिने पदार्थ करिब २ ग्रामसहित बिर्तामोड नगरपालिका-४ बस्ने २० वर्षीय महममताज अलीलाई आइतबार साँझ इलाका प्रहरी कार्यालय काँकरभिट्टाबाट खटिएको प्रहरीले पक्राउ गरेको छ ।

सर्लाहीको बागमती नगरपालिका-११ स्थित सडकबाट अवैध लागूऔषध गाँजा करिब १० केजीसहित रौतहट गरुडा नगरपालिका-८ बस्ने ४० वर्षीय रामानन्द साह समेत दुई जनालाई आइतबार साँझ प्रहरीले पक्राउ गरेको छ । इलाका प्रहरी कार्यालय कर्मैया र इलाका प्रहरी कार्यालय हरिवनबाट खटिएको संयुक्त टोलीले प्रदेश ३-०१-०२२ च ६५१५ नम्बरको कारलाई जाँच गर्ने क्रममा डिकीमा लुकाई ल्याएको उक्त परिमाणको गाँजा फेला पारी कारमा सवार उनीहरूलाई पक्राउ गरेको हो ।

कञ्चनपुरको कृष्णपुर नगरपालिका-७ चम्मन चौराहबाट अवैध लागूऔषध ब्राउनसुगर करिब १ सय मिलिग्रामसहित सोही नगरपालिका-७ सिगलपट्टी बस्ने २४ वर्षीय विकास बिकलाई आइतबार राति प्रहरीले पक्राउ गरेको छ । इलाका प्रहरी कार्यालय गुलरीया, इलाका प्रहरी कार्यालय रैकवार र अस्थायी ट्राफिक प्रहरी पोष्ट गुलरीयाबाट खटिएको संयुक्त टोलीले से.५ प ७९९९ नम्बरको मोटरसाइकल जाँच गर्ने क्रममा चालक बिकलाई उक्त लागूऔषधसहित पक्राउ गरेको हो ।

कपिलवस्तु, मायादेवी गाउँपालिका-४ तुल्सिडिहवाबाट अवैध लागूऔषध ब्राउनसुगर जस्तो देखिने पदार्थ करिब ८ ग्रामसहित वाणगंगा नगरपालिका-१ बैरिया बस्ने ३१ वर्षीय बिबेक थारु समेत २ जनालाई आइतबार राति प्रहरीले पक्राउ गरेको छ । प्रहरी चौकी तुल्सीपुर बलुहवाबाट खटिएको प्रहरीले लु.७७ प १६२ नम्बरको मोटरसाइकलमा सवार उनीहरूलाई उक्त पदार्थसहित पक्राउ गरेको हो ।