गृहमन्त्रीको राजीनामा बिना सुन प्रकरणको छानविन प्रभावित हुने एमालेको अडानपछि बनेन् समिति

१५ साउन, काठमाडौं । सुन तस्करी प्रकरणको छानविनका लागि कुन तहको र कस्तो प्रकृतिको उच्चस्तरीय छानविन समिति बनाउने भन्ने कुरामा नै प्रमुख दलहरू अलमलिएका छन् । सरकारले उच्च स्तरको समिति घोषणा नगरेसम्म एमाले व्याक नहुने भनेपछि सोमबारको बैठक पनि स्थगित भएको छ । लगातार विपक्षी दल एमालेले संसद बैठक अवरुद्ध गर्दै आएपछि संसद खुलाउनेबारे शीर्ष नेताबीच भएको छलफलपनि सहमतिमा नपुगेर टुंगिएको छ । 

प्रधानमन्त्री पुष्पकमल दाहाल प्रचण्ड र एमाले अध्यक्ष केपी शर्मा ओलीबीच आज छलफल भएको थियो । तर, उच्चस्तरीय समिति बनाउने बुरामै सहमति भएन । एमालेले गृहमन्त्री नारायणकाजी श्रेष्ठ र अर्थमन्त्री डा. प्रकाशशरण महतले राजीनामा नदिइ बनाएको समितिले निष्पक्ष छानविन गर्न नसक्ने भन्दै ओलीले पहिले राजीनामा गराउन भनेका थिए । प्रधानमन्त्री प्रचण्डले राजीनामाको कुरा अहिले सम्भव नहुने अडान राखेको प्रधानमन्त्रीको सचिवालयले जनाएको छ ।    

प्रचण्ड र ओलीबीच सहमति नभएपछि आजको संसद बैठक बस्न नसक्ने भन्दै सभामुखलाई भोलिका लागि सार्न आग्रह गरिएको थियो । सोही अनुसार प्रतिनिधिसभाको सोमबार बोलाइएको बैठक बस्दै नबसी स्थगित भयो । प्रमुख प्रतिपक्षी दल एमालेले त्रिभुवन अन्तर्राष्ट्रिय विमानस्थलबाट भएको सुन तस्करीबारे छानबिन गर्न उच्चस्तरीय छानबिन समिति गठन नगरेसम्म संसद चल्न नदिने बताएपछि प्रतिनिधिसभाको सोमबार १ बजे बोलाइएको बैठक बस्दै नबसी स्थगित भएको हो ।
 
सुन तस्करी प्रकरणको छानबिन गर्नका लागि पहिले सरकारले उच्चस्तरीय छानबिन समिति गठन गर्नुपर्ने अडान एमालेले राखेको थियो । उच्चस्तरीय समिति गठन नगरी संसद चलाउन खोजेमा वेल घेराउ गर्ने र संसद चल्न नदिने जानकारी एमालेले सभामुखलाई सोमबार मध्यान्ह दिएको थियो । एमाले सचेतक महेश बर्तौलाले सुन तस्करीको विषयमा छानबिन गर्नका लागि तत्काल उच्चस्तरीय छानबिन समिति गठन गर्नुपर्ने अडान कायमै रहेको बताए । 

सभामुखले एमालेलगायतका दलका संसदीय पदाधिकारीसँग संसदको अवरोध खुलाउनेबारे छलफल गरेका थिए । त्यसपछि सभामुख घिमिरेले उपप्रधान तथा गृहमन्त्री नारायणकाजी श्रेष्ठसँग पनि छलफल गरेका थिए । एमालेले उच्चस्तरीय छानबिन समिति गठनको अडान नछोडेको र सरकारको तर्फबाट त्यसमा सकारात्मक जवाफ नआएपछि सभामुखले सूचना टाँसेर बैठक स्थगित गर्न लगाएका हुन् ।

एमालेले सुन तस्करीको विषयमा छानबिन गर्नका लागि तत्काल उच्चस्तरीय छानबिन समिति गठन गर्नुपर्ने माग अघि राख्दै आएको छ । यसअघि १० साउनमा बोलाइएको बैठकमा उच्चस्तरीय छानबिन समितिको माग गर्दै एमालेले बैठक अवरुद्ध गरेको थियो । सोमबार पनि एमालेले त्यही अडान राखेपछि सरकारको आग्रहमा सभामुख देवराज घिमिरेले प्रतिनिधिसभाको बैठक मंगलबार दिउँसो १ बजेसम्मका लागि स्थगित गरेका सभामुखको सचिवालयले बताएको छ । 

यसअघि सोमबार बिहान संसद खुलाउने विषयमा नेपाली कांग्रेस, नेकपा एमाले र माओवादी केन्द्रका शीर्ष नेता छलफलमा बसेका थिए । तर, राजीनामाको कुरा नमिले पनि समिति बनाउने विषयमा नै सहमति नजुटेको हो ।