ओलीलाई जनताको संसदप्रति गम्भीर हुनुपर्यो भन्दै सभामुख घिमिरेले बोलाए कार्यव्यवस्था समितिको बैठक

१६ साउन, काठमाडौं । संसद खुलाउनेबारे सभामुख देवराज घिमिरेले पहल थालेका छन् । उनले प्रधानमन्त्री पुष्पकमल दाहाल प्रचण्ड र नेकपा एमालेका अध्यक्ष केपी शर्मा ओलीसँग मंगलबार बिहान संवाद गरेको संसद सचिवालयले जनाएको छ । सभामुख घिमिरेले टेलिफोन संवाद गरेका हुन् । 

उनले निरन्तर संसद बैठक रोकिँदा जनताको आवाज अवरुद्ध हुने भन्दै गम्भीर हुन प्रधानमन्त्री र प्रतिपक्ष दलका नेता ओलीको ध्यानाकर्षण गराएका थिए । उनले विपक्षी दलका नेता ओलीलाई पटक पटक बैठक अवरुद्ध हुँदा संसदीय अभ्यासमा गलत नजिर बस्ने भन्दै गम्भीर भएर सांसदहरुलाई निर्देशन दिन आग्रह गरेका थिए ।  

दुई नेतासँगको छलफल पनि सभामुख घिमिरेले सदनको अवरोध खुलाउने विषयमा छलफल गर्न कार्य व्यवस्था परामर्श समितिको बैठक बेलाएका छन् । आज दिउँसो १२ बजे बानेश्वरमा बस्ने गरी कार्य व्यवस्था परामर्श समितिको बैठक आह्वान गरिएको सचिवालयले जनाएको छ ।

संसदको अवरोध अन्त्य गर्ने विषयमा हिजो पनि सभामुखले प्रधानमन्त्री, विपक्षी दलका नेता, गृहमन्त्री, प्रमुख सचेतक र सचेतकहरूसँग छलफल गरेका थिए । तर, सहमति नभएपछि सूचना टाँसेर बैठक स्थगित गरिएको थियो ।