निर्माण सामाग्रीसहित बालुवाटारमा निर्माण व्यवसायीको विरोध प्रदर्शन

१६ साउन, काठमाडौं । भुक्तानी पाउनु पर्ने लगायतका माग राख्दै आन्दोलन गरिरहेका निर्माण व्यवसायीहरूले बालुवाटार स्थित प्रधानमन्त्री निवास नजिक निर्माण सामाग्रीसहित प्रदर्शन गरेका छन् । मंगलबार बिहान विरोध प्रदर्शनमा उत्रिएका उनीहरूलाई एक साइडमा लगाएर प्रहरीले यातायात भने सुचारु गराएको थियो । 

विरोध प्रदर्शन कार्यक्रममा बोल्दै नेपाल निर्माण व्यवसायी महासंघका अध्यक्ष रवि सिंहले सम्पूर्ण ठेक्काको एकमुष्ट म्याद थप हुनुपर्ने लगायतका ९ बुँदे मागसहित आन्दोलन थालेको जानकारी गराउँदै माग सम्बोधन नभएसम्म आन्दोलन जारी रहने बताए । निर्माण उद्योगमा भएका समस्यालाई चाँडो सम्बोधन गरी देश निर्माणका संवाहक निर्माण व्यवसायीहरुलाई चाँडै काममा फर्काउने वातावरण सरकारले बनाउन उनले माग गरे ।

व्यवसायीहरूले सार्वजनिक खरिद अनुगमन अघि सार्वजनिक खरिद ऐन तथा नियमावली तत्काल संशोधन गर, सम्पूर्ण ठेक्काको एकमुष्ट म्याद थप गर, जुनसुकै अवधिको ठेक्काको मूल्य समायोजन गर, उपभोक्ता समितिबाट हुने निर्माण कार्य खारेज गर लगायतका नारा लेखिएका प्लेकार्डसहित प्रदर्शन गरेका छन् ।