एमालेले आफ्ना कुरा राखुन्जेल सुन तस्करीको छानविनका लागि समिति घोषणा नभए संसद चल्न नदिने

१६ साउन, काठमाडौं । प्रमुख प्रतिपक्षी दल नेकपा एमालेले आजको संसद बैठक आफ्ना कुरा राखुन्जेलमात्र चल्न दिने भएको छ । प्रतिनिधिसभाको बैठक सुरु भएपछि एमालेले आफ्ना भनाइ राख्ने र त्यो समय सम्म सुन तस्करी प्रकरणको छानविनका लागि उच्चस्तरीय समिति बनेको घोषणा नभएर बैठक अवरुद्ध गर्ने जनाएको छ ।  

प्रतिनिधिसभाको बैठक अघि बसेको कार्य व्यवस्था परामर्श समितिको बैठकमा एमालेले यो प्रकरणमा मन्त्री र प्रधानमन्त्रीकै संलग्नता भएको हुनसक्ने आशंका रहेको भन्दै उच्चस्तरीय छानबिन समिति नबन्दासम्म प्रतिनिधि सभाको बैठक चल्न नदिने अडान राखेको हो । 

सत्तापक्षका नेताहरूले भने सुन तस्करीबारे नियमित प्रक्रियाबाट नै छानबिन अघि बढी रहेकाले तत्काल उच्चस्तरीय समिति बनाउन आवश्यक नरहेको धारणा राखेका थिए । दुवै पक्ष आ-आफ्नो अडानबाट पछि नहटेपछि मंगलबारको बैठक पनि नियमित सञ्चालनमा बाधा पर्ने भएको छ । सोमबारको बैठक सूचना टाँसेर स्थगित भएको थियो ।

यसअघि गत साउन १० गते बसेको बैठकमा एमालेले छानबिन समिति गठनको माग गर्दै प्रतिनिधिसभा अवरोध गरेको थियो ।