चालु आवको पहिलो त्रैमासमा ५५ अर्ब आन्तरिक ऋण उठाइने

१६ साउन, काठमाडौं । सरकारले चालु आर्थिक वर्षको पहिलो त्रैमासमा नै ५५ अर्ब आन्तरिक ऋण उठाउने लक्ष्य लिएको छ । उसले चालु् आवमा चार वटा त्रैमासमा गरी कूल २ खर्ब ४० अर्ब रुपैयाँ आन्तरिक ऋण उठाउने लक्ष्य राखेको छ । 

केन्द्रीय बैंकले मंगलबार सार्वजनिक गरेको तालिका अनुसार पहिलो त्रैमासअन्तर्गत साउन, भदौ र असोजमा गरी ५५ अर्ब रुपैयाँ आन्तरिक ऋण उठाउनेछ । 

दोस्रो त्रैमासअन्तर्गत कात्तिक, मंसिर र पुसमा ५५ अर्ब रुपैयाँ, तेस्रो त्रैमास अर्थात माघ, फागुन र चैतमा ५३ अर्ब रुपैयाँ र अन्तिम त्रैमास अर्थात बैशाख, जेठ र असारमा ७७ अर्ब रुपैयाँ आन्तरिक ऋण उठाइने राष्ट्र बैंकले जनाएको छ । 

यसमा ट्रेजरी बिलमार्फत ५५ अर्ब रुपैयाँ उठाइनेछ भने विकास ऋणपत्रमार्फत १ खर्ब ७९ अर्ब रुपैयाँ उठाइनेछ । जसका लागि २८, ९१, १८२ र ३६४ दिने ट्रेजरी बिल जारी गरिनेछ भने ५ वर्षे, ६ वर्षे र ८ वर्षे गरी तीन किसिममा विकास ऋणपत्र जारी गर्ने बैंकले जनाएको छ । 

साथै ५ वर्षे अवधिको नागरिक बचतपत्रमार्फत ५ अर्ब रुपैयाँ र वैदेशिक रोजगार बचतपत्रमार्फत १ अर्ब रुपैयाँ ऋण उठाउने योजना बनाएको जनाइएको छ । 

सरकारले ल्याएको चालु आवको बजेट कार्यान्वयनका लागि आन्तरिक ऋणलाई महत्वपूर्ण आधार बनाएको छ ।