लम्पी स्किन महामारीबारे रास्वपाले संसदमा दर्ता गर्यो जरुरी सार्वजनिक महत्त्वको प्रस्ताव

 १६ साउन, काठमाडौं । राष्ट्रिय स्वतन्त्र पार्टी (रास्वपा) ले संसदमा लम्पी स्किन महामारीको विषयमा प्रतिनिधिसभा बैठकमा छलफल गर्नुपर्ने माग गर्दै जरुरी सार्वजनिक महत्त्वको प्रस्ताव दर्ता गराएको छ । मंगलबार संसद सचिवालयमा दर्ता गरिएको प्रस्तावमा लम्पी स्किन रोगमा प्रभावितहरूलाई खोपको व्यवस्था गर्न र पीडित किसानहरूलाई क्षतिपूर्तिको व्यवस्था गर्ने विषयमा छलफल आवश्यक उल्लेख छ । 

लम्पी स्किन रोग नियन्त्रणका लागि आवश्यक औषधि खरिद र आपूर्ति गर्न चाहिने बजेट व्यवस्थापन गर्न सरकारले के कस्तो योजना बनाएको छ ।  सो योजनाबारे सरकारसँग जानकारी माग गर्न प्रस्ताव दर्ता गरिएको रास्वपाका सभापति रवि लामिछानेले बताएका छन् । 

पशु स्वास्थ्य बीमा, एक पालिका एक भेटेरिनरी कार्यक्रमको कार्यान्वयनको अवस्था, खोप उत्पादनका लागि नेपालमा भइरहेको प्रयास, रोग नियन्त्रण प्रयासमा किसानको सहभागिताको अवस्थालगायत विषयमा छलफल आवश्यक भएको रास्वपाले दर्ता गराएको प्रस्तावमा उल्लेख छ ।