गलत सूचनाका आधारमा विदेशी सेनामा भर्ना नहुनु : परराष्ट्र मन्त्रालय

१६ साउन, काठमाडौं । परराष्ट्र मन्त्रालयले गलत सूचनाका आधारमा विदेशी सेनामा भर्ना नहुन सूचित गरेको छ । मन्त्रालयले मंगलबार एक प्रेस विज्ञप्ति जारी गर्दै सामाजिक सञ्जाल र सञ्चार माध्यमहरूमा नेपाली नागरिक विदेशी सेनामा भर्ना भएको भन्ने समाचारप्रति ध्यानाकर्षण भएको भन्दै भर्ना नहुन वा काम गर्न नजान सचेत गराएको हो ।

विभिन्न सञ्चार माध्यममा रुसी सेनामा नेपालीहरू भर्ना भएको समाचार नरोकिएपछि सूचना जारी गरेर यस्तो बताएको हो । उसले परम्परागत रुपमा सम्झौता भएका मुलुकमा बाहेकका मुलुकमा सेनामा नजान भनेको छ । गलत तरिकाले विदेशी सेनामा काम गर्न जाँदा उद्धार र जोखिम बढ्ने समेत जनाइएको छ । मन्त्रालयले युद्धग्रस्त देशमा सुरक्षा सम्बन्धी काममा नजान समेत अनुरोध गरेको छ ।

जारी विज्ञप्तिमा भनिएको छ, ‘विदेशी सेनामा नेपाली नागरिकहरू भर्ना सम्बन्धमा परम्परागत रूपमा सम्झौता अन्तर्गत केही मित्रराष्ट्रको राष्ट्रिय सेनामा भर्ना हुँदै आएकोमा बाहेक अन्य विदेशी सेनामा नेपाली नागरिक भर्ना हुन अनुमति दिने सम्बन्धी नेपाल सरकारको नीति नरहेको जानकारी गराइन्छ । यस्ता कार्यमा संलग्न हुँदा आइ पर्ने जोखिम र उद्धारमा हुने कठिनाइप्रति सजग रहन सूचित गरिन्छ ।’