दुई वडाध्यक्षसहित जुवाखालबाट १० जना पक्राउ

१७ साउन, काठमाडौं । प्रहरीले कैलालीको धनगढीमा जुवाखालबाट वडाध्यक्षसहित १० जनालाई पक्राउ गरेको छ । धनगढीको बसपार्कस्थित कलेल होटलबाट जुवा खेलिरहेका १० जनालाई मंगलबार साँझ पक्राउ गरिएको जिल्ला प्रहरी कार्यालय कैलालीले जनाएको छ ।

पक्राउ पर्नेमा डोटीको पूर्वीचौकी गाउँपालिका वडा नं. २ का वडाध्यक्ष अध्यक्ष योगेन्द्र ठकुल्ला र सोही पालिकाको वडा नं. ५ का अध्यक्ष खडक साउद समेत छन् । 

पक्राउ पर्ने अन्यमा होटल सञ्चालनक तेजबहादुर वली, सरकारी कर्मचारी, शिक्षक र विभिन्न राजनीति दलका नेताहरू रहेका छन् । प्रहरीका अनुसार पूर्वीचौकी गाउँपालिका एकीकृत समाजवादी पार्टीका प्रदेश कमिटी सदस्य देवलाल खड्का र सोही पालिका बस्ने माओवादी केन्द्रका प्रदेश कमिटी सदस्य धनबहादुर विष्ट छन् । साथै पक्राउ परेका कैलालीको गोदावरी नगरपालिका–३ का कुवेर खड्का नेपाली कांग्रेसको पूर्वजिल्ला सदस्य रहेका छन् । 

खानेपानी तथा सरसफाइका कर्मचारी डोटीको दीपायल सिलगढी नगरपालिकाका सुजित खड्का पक्राउ परेका छन् । एक जना शिक्षक पनि पक्राउ परेका छन् । पूर्वीचौकी गाउँपालिका–१ का पुरन बहादुर खड्का शिक्षक रहेको खुलेको छ । अन्यमा पूर्वीचौकी गाउँपालिका–३ का अमित बोहरा र सोही पालिकाको वडा नं. २ का अविनाश कठायत छन् ।

उनीहरुलाई जुवाखालबाट एक लाख ४ हजार ८१० रुपैयाँ र तास बरामदसहित पक्राउ गरिएको हो । पक्राउ परेका अभियुक्तहरुलाई आज जिल्ला अदालतबाट म्याद लिई आवश्यक अनुसन्धान हुने प्रहरीले जनाएको छ ।