माओवादी केन्द्रले मंसिरमा विधान अधिवेशन गर्ने

१७ साउन, काठमाडौं । सरकारको नेतृत्व गरिरहेको नेकपा (माओवादी केन्द्र)ले आगामी मंसिरमा पार्टीको विधान अधिवशेन गर्ने भएको छ  ।

बुधबार बिहान मुख्यालय पेरिसडाँडामा बसेको स्थायी कमिटी बैठकले मंसिरमा विधान अधिवेशन गर्ने निर्णय गरेको हो । अर्को मंसिरमा भने पार्टीको विशेष सम्मेलन गर्ने भएको छ । 

बैठकमा प्रधानमन्त्री समेत रहेका पार्टी अध्यक्ष पुष्पकमल दाहाल ‘प्रचण्ड’ले गरेको प्रस्ताव पारित भएको छ । पारित प्रस्तावलाई आज दिउँसो १ बजे बस्ने पार्टीको केन्द्रीय समिति बैठकमा लैजानेछ । 

उक्त बैठकमा प्रचण्डले पार्टीको राजनीतिक तथा सांगठनिक र समसामयिक प्रतिवेदन पेश गर्नेछन् । त्यसमाथि केन्द्रीय समिति सदस्यहरू सबैले धारणा राख्ने क्रम सुरू हुनेछ । बैठकमा ३८७ जना केन्द्रीय सदस्य, प्रदेशका पदाधिकारी, आयोग तथा विभाग प्रमुखहरू गरी ७५८ जना सहभागी हुने  उपाध्यक्ष कृष्णबहादुर महराले जानकारी दिए ।